Hazırda "Nyukasl"ın şərəfini qoruyan Maykl Ouen yığma komandanın da formasını geyinə biləcək. Belə ki, İngiltərə millisinin baş məşqçisi Fabio Kapello Ouenin hər zaman əsas heyətdə oynamağa şansı olduğunu bildirib: "Maykl Ouen olduqca təcrübəli bir futbolçudur və mən ona komandanın əsas heyətində yer verməyi düşünürəm. Ümumi götürdükdə, komandadakı 23 futbolçunun hər biri öz işində təcrübəlidir. Lakin onlardan hələ ki heç biri mənim "gözümə girməyib" və sözün açığı, kimin oynayıb, kimin oynamamasını seçməkdə bir qədər çətinlik çəkəcəyimi hesab edirəm, qərar vermək çox çətin olacaq. Bu futbolçularla çoxlu uğurlar qazanacağıq. Bunun nə zaman baş verəcəyini dəqiq deyə bilmərəm, çünki heç kim gələcəkdə nə olacağını deyə bilməz. Lakin uğurların bizi gözlədiyinə əminəm".

Braziliyalı yarımmüdafiəçi Amanitu Mansini hazırda çıxış etdiyi İtaliyanın "Roma" klubu ilə yeni müqavilə imzalayacaq. Belə ki, mətbuat konfransı zamanı sualları cavablandıran Mansini, komandadan ayrılmaq niyyətində olmadığını, hətta bu yaxınlarda hazırkı müqaviləsinin müddətini bir qədər də uzadacaqlarını bildirib: "Mən komandamdan olduqca razıyam və buna görə də karyeramı məhz "Roma"da davam etdirmək istəyirəm. Yaxın günlərdə isə yeni müqavilə imzalamağı düşünürəm". Nəzərinizə çatdıraq ki, təcrübəli yarımmüdafiəçi bu mövsüm "A" Seriyasının 18 qarşılaşmasında "Roma"nın şərəfini qoruyub və rəqib qapısına 5 dəfə yol tapa bilib.
   

Azərbaycan Otüstü Xokkey Federasiyasından bildirmişlər ki, qadınlardan ibarət otüstü xokkey komandamız Bakıda təlim-məşq toplanışına başlayıb. Təlim-məşq toplanışı apreldə paytaxtımızda keçiriləcək lisenziya xarakterli turnirə hazırlıq xarakteri daşıyır.
   Pakistanlı Tahir Zamanın rəhbərlik etdiyi qadınlardan ibarət otüstü xokkey millimizin heyətinə 21 yaşlılardan ibarət yığmanın da bir neçə üzvü cəlb edilmişdir. Xatırladaq ki, apreldə keçiriləcək yarışda Azərbaycan millisi ilə yanaşı, İspaniya, Ukrayna, Belarus, Keniya və Çili komandaları iştirak edəcəklər. Qalib komanda Pekin Olimpiya Oyunlarında iştirakını təmin edəcəkdir.
   

"Fiorentina"nın heyətində çıxış edən çexiyalı futbolçu Tomas Uyfaluşi karyerasını başqa bir klubda davam etdirə bilər. Məsələ burasındadır ki, sözügedən müdafiəçi ilə İspaniya "Atletiko"su yaxından maraqlanır. UEFA-nın rəsmi internet ünvanının yaydığı xəbərlərə əsasən, ispanlar Uyfaluşinin transferi üçün "Fiorentina" nümayəndələri ilə danışıqlar aparmaqdadırlar. 29 yaşlı futbolçunun özü isə "Atletiko"nun təklifini qəbul edib və bu yaxınlarda verdiyi müsahibəsində İspaniyada top qovmaq arzusunda olduğunu deyib: "Atletiko"nun təklifi məni cəzb etdi və mən onlara "yox" deyə bilmədim. İspaniya futbolu mənə hər zaman maraqlı gəlib. Həmişə hər hansı bir ispan klubunda çıxış etmək arzusunda olmuşam. İndi isə, deyəsən, arzularım gerçəkləşir. Lakin transferin mümkün olması üçün gərək həm də onlar mənim hazırkı klubumla da razılığa gələ bilsinlər. Əgər tərəflər arasında razılıq əldə olunsa, o zaman çox sevinərəm". Onu da nəzərinizə çatdıraq ki, Uyfaluşi bu mövsüm "A" Seriyasının 14 qarşılaşmasında "Fiorentina"nın şərəfini qoruyub.
   

"Sent Etyenn"in forması altında çıxış edən Ceremi Jamo çempionatın irəlidəki qarşılaşmalarında komandasına kömək edə bilməyəcək. Belə ki, 30 yaşlı qolkiperin zədəsi hələ tam olaraq sağalmayıb və buna görə də Ceremi hələ bir neçə müddət də meydanlardan kənarda qalmalı olacaq: "Ayağımdakı ağrılar hələ də səngimək bilmir. Həkimlər mənə bir neçə gün istirahət etməyi məsləhət görüblər. Əgər bu vaxt ərzində heç bir dəyişiklik olmasa, o zaman əməliyyat olunmalı olacam". Xatırladaq ki, sözügedən futbolçu yanvar ayının 19-dan etibarən meydana çıxmayıb. Ötən mövsüm isə Ceremi Fransa çempionatının 21 yarışmasında "Sent Etyenn"in formasını geyinmişdi.