Azərbaycanda səfərdə olan Avropa Şurası Parlament Assambleyasının (AŞ PA) Dağlıq Qarabağ münaqişəsi üzrə Alt Komitəsinin sədri Lord Rassel Conston görüşlərə başlayıb. Lord Rassel Conston Milli Məclisin sədri Oqtay Əsədovla görüşüb. Görüşdə O.Əsədov AŞ PA-nın Ermənistanın işğalçı dövlət olduğunu təsdiqləyən 1416 saylı qətnaməni yerinə yetirmək üçün bu ölkəyə təzyiq etməyə çağırıb. R.Constonun Azərbaycanın dostu olduğunu diqqətə çatdıran spiker onun Dağlıq Qarabağ münaqişəsinin həlli istiqamətində aparılan danışıqlarda böyük rol oynadığını vurğulayıb. Danışıqlarda münaqişənin sülh yolu ilə həll edilməsində parlamentarilərin rolu, qarşılıqlı əməkdaşlıq və digər məsələlər müzakirə olunub.
   Qeyd edək ki, AŞ PA aprel ayında Strasburqda Dağlıq Qarabağ münaqişəsinin həllinə dair Azərbaycan və Ermənistanı təmsil edən deputatların iştirakı ilə konfrans keçirmək istəyir. Xatırladaq ki, R.Conston regiona səfəri çərçivəsində bu gün Ermənistanda olacaq.

Dünən Ombudsman Elmira Süleymanova Sənubi Koreyanın paytaxtı Seul şəhərinə yola düşüb. Səfərdə məqsəd fevralın 9-13-ü tarixlərində Seulda keçiriləcək Ümumdünya Sülh sammitində iştirak etməkdir. Bu barədə məlumatı Ombudsman Aparatından veriblər.
   Tədbirdə dünyanın 190-na qədər ölkəsinin dövlət və ictimai xadimləri, nüfuzlu beynəlxalq ekspertlər, milli insan hüquqları təsisatlarının təmsilçiləri, vətəndaş cəmiyyəti nümayəndələrinin iştirakı nəzərdə tutulub. Beynəlxalq konfransda E.Süleymanova illik məruzələri, Ermənistanın xalqımıza qarşı törətdiyi terror aktları və soyqırımlarla bağlı Bəyanatları, Heydər Əliyev Fondunun Qarabağ müharibəsinin dəhşətlərindən bəhs edən ingilis dilində nəşrləri, İnsan Hüquqlarının Müdafiəsi üzrə Milli Fəaliyyət Planının nüsxələri iştirakçılara təqdim olunacaq.
   

Fevralın 23-də Fransanın Strasburq şəhərindəki Brogli meydanında Türk və Azərbaycan təşkilatları birgə mitinq keçirəcək. Bu barədə məlumatı Xarici Ölkələrdə Yaşayan Azərbaycanlılarla İş üzrə Dövlət Komitəsindən veriblər. Xocalı soyqırımının 16-cı ildönümünə həsr olunan mitinqdə günahsız Azərbaycan xalqına qarşı törədilən vəhşiliklərdə Ermənistan prezidenti Robert Köçəryanın şəxsən iştirakı vurğulanacaq, onun Beynəlxalq Tribunala verilməsi tələb ediləcək. Bundan başqa mitinqdə Xocalı faciəsinin tam əks olunduğu ingilis və fransız dilində kitablar, eləcə də bu soyqırımla bağlı fransız dilində xüsusi hazırlanmış qəzet paylanacaq. Aksiyanın sonunda qəbul olunacaq qətnamə Avropa Birliyi və Avropa Şurasının məsul şəxslərinə təqdim olunacaq. Qeyd edək ki, bu aksiyanın keçirilməsi ilə bağlı Strasburq şəhərinin müvafiq strukturlarının razılığı alınıb.

Fevralın 11-də "Azərbaycan məktəblərində iqtisadiyyatın tədrisi" Proqramı çərçivəsində Tətbiqi İqtisadiyyat üzrə Milli Olimpiadanın son mərhələsi ilə bağlı "Məktəblinin Biznes Günü" adlı tədbir keçiriləcək. Bu barədə məlumatı ABŞ-ın Beynəlxalq İnkişaf Agentliyinin (USAİD) Bakı nümayəndəliyindən veriblər. USAİD-in və fərdi sponsorların maliyyələşdirdiyi "Azərbaycan məktəblərində iqtisadiyyatın tədrisi" proqramı 2003-cü ildən "Junior Achievement Azərbaycan" (JA) tərəfindən həyata keçirilir və "Project Harmony" təşkilatı tərəfindən idarə olunur. Tədbirdə təhsil naziri Misir Mərdanov, USAİD-in Azərbaycan üzrə koordinatoru Skot Teylor, yerli və beynəlxalq biznes şirkətlərinin nümayəndələri və məktəb icmasının üzvləri iştirak edəcək. Qeyd edək ki, 1998-ci ildə təsis olunan JA Azərbaycan "Ümumdünya Junior Achievement" təşkilatının yerli təmsilçisidir. 2000-ci ildən etibarən JA Azərbaycanın 26 bölgəsindən 230 məktəbi təmsil edən 94 mindən artıq şagirdə və 380 müəllimə təlim keçib.
   

Bəzi beynəlxalq təşkilatlar Dağlıq Qarabağda fəaliyyət göstərən separatçı rejimə maliyyə vəsaiti ayırmaq istəyir. Bu barədə açıqlamanı ekologiya və təbii sərvətlər naziri Hüseyn Bağırov verib. H.Bağırov hər bir Azərbaycan vətəndaşının ermənilər tərəfindən törədilən hadisələrə qarşı təbliğat aparmasını vacib sayıb. "Ermənilər Azərbaycanla total müharibə aparır və biz də bu kimi vəhşiliklərə qarşı mübarizə aparmalıyıq. Bizim işimiz təbliğat üzərində qurulub. Beynəlxalq təşkilatlar isə təkcə yanğınlarla bağlı deyil, bütün məsələlərdə Azərbaycana ikili standartlarla yanaşır"-deyə H.Bağırov əlavə edib. H.Bağırov ermənilərin törətdiyi bütün hadisələrin arxasında radikal siyasi mövqelərin durduğunu bəyan edib.
   

Dünən Prezident yanında Dövlət Qulluğu Məsələləri üzrə Komissiya (DQMK) dövlət orqanlarında vakant vəzifələrin tutulması üçün növbəti dəfə müsabiqə elan edib. Bu barədə məlumatı DQMK-nın mətbuat xidmətindən veriblər.
   Müsabiqədə DQMK (2 vəzifə üzrə 3 yer), Tələbə Qəbulu üzrə Dövlət Komissiyası (4- 4 yer), Mədəniyyət və Turizm Nazirliyi (12-12 yer), Qiymətli Kağızlar üzrə Dövlət Komitəsi (3-3 yer), Nəqliyyat Nazirliyi (6-7 yer), Dövlət Torpaq və Xəritəçəkmə Komitəsi (9-9 yer), Qaçqınların və Məcburi Köçkünlərin İşləri üzrə Dövlət Komitəsi (6-6 yer), Standartlaşdırma, Metrologiya və Patent üzrə Dövlət Agentliyi (16-19 yer), Dövlət Sosial Müdafiə Fondu (27 - 28 yer), Dövlət Statistika Komitəsi (16-17 yer), Daşınmaz Əmlakın Dövlət Reyestri Xidməti (4 - 4 yer), Ekologiya və Təbii Sərvətlər Nazirliyi (20 - 23 yer), Təhsil Nazirliyi (36 - 45 yer), Müəllif Hüquqları Agentliyi (3 - 3 yer), İqtisadi İnkişaf Nazirliyi (10 - 19 yer), Əmək və Əhalinin Sosial Müdafiəsi Nazirliyi (53 - 53 yer), Səhiyyə Nazirliyi (10 - 10 yer), Dövlət Əmlakının İdarə Edilməsi üzrə Dövlət Komitəsi (50 - 76 yer), Nazirlər Kabineti yanında Dövlət Dəniz Administrasiyası (3 - 3 yer), Rabitə və İnformasiya Texnologiyaları Nazirliyi (8 - 8 yer), Kənd Təsərrüfatı Nazirliyi (10 - 10 yer), Dini Qurumlarla İş üzrə Dövlət Komitəsi (8 - 8 yer), Ailə, Qadın və Uşaq Problemləri üzrə Dövlət Komitəsi (5 - 5 yer), Kənd Təsərrüfatı Nazirliyi yanında Dövlət Fitosanitar Nəzarəti Xidməti (1 yer), Dövlət Miqrasiya Xidməti (38 - 48 yer), Tarif (qiymət) Şurası Katibliyi (4 - 4 yer), Dövlət Şəhərsalma və Arxitektura Komitəsi (12 - 12 yer) və Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi (1 yer) iştirak edir.
   
   
   
   

Nazirlər Kabineti ölkə vətəndaşlarına, daimi yaşayan əcnəbilərə və vətəndaşlığı olmayan şəxslərə verilən fərdi identifikasiya nömrəsinin daxil edilməli olduğu və həmin şəxslərin uçotunun aparıldığı dövlət informasiya sistemlərinin siyahısını təsdiq edib. Bu barədə məlumat NK-dən verilib. Qurumun məlumatına görə, vətəndaşlıq vəziyyəti aktlarının ümumrespublika elektron məlumat bankı Ədliyyə Nazirliyinə həvalə olunub. "Giriş-çıxış" avtomatlaşdırılmış məlumat axtarış sistemi, sürücülük vəsiqələrinin avtomatlaşdırılmış məlumat sistemi DİN tərəfindən yaradılacaq. Vergi ödəyicilərinin vahid dövlət reyestri Vergilər Nazirliyi, əhalinin sağlamlığının milli monitorinq sistemi, doğum və ölüm reyestri Səhiyyə Nazirliyi, valideyn himayəsindən məhrum olan uşaqların mərkəzləşdirilmiş reyestri Səhiyyə və Təhsil nazirlikləri tərəfindən aparılacaq. Mərkəzləşdirilmiş kredit reyestri xidməti Milli Banka həvalə olunub.
   

Tələbə Qəbulu üzrə Dövlət Komissiyası müəllimləri test tapşırıqları yazmağa dəvət edib. Bu barədə məlumat TQDK-dan verilib. Qurumun məlumatına görə, test tapşırıqlarının yazılmasında təhsil sahəsində peşəkarlığı ilə fərqlənən və ali məktəblərə qəbul imtahanlarında yüksək göstəricilər əldə edən şəhər və kənd məktəblərinin müəllimləri iştirak edə bilərlər. Məqsəd test bankını zənginləşdirməkdir.

Bayraq bizim dövlət rəmzlərimizdən biridir. Ona hörmət etmək hər bir kəsin börcudur. Ölkəmizdə dövlət bayrağına lazımınca diqqət yetirilmir. Məsələn, əksər ali məktəb binalarının qarşısında dövlət bayrağı asılmayıb. Elə bunun səbəbini öyrənmək məqsədilə ali məktəblərin prorektorlarına müraciət etdik. Azərbaycan Dövlət Mədəniyyət və İncəsənət Universitetinin prorektoru Rafiq Sadıqov dövlət bayrağını binanın qarşısında asılmamasının səbəbini hava şəraiti ilə əlaqəlandirdi: "Dövlət Bayrağı bizim universitetin qarşısında ancaq bayramlarda asılır. Çünki hazırda qış fəslində yaşayırıq. Bununla əlaqədar olaraq vaxtaşırı yağış, qar yağır. Ona görə də, belə bir şəraitdə dövlət bayrağının daimi olaraq binanın qarşısında asılması bayrağı ucuzlaşdırmaq olar".
   Azərbaycan Dövlət Slavyan Universitetinin prorektoru Asif Hacıyev də dövlət bayrağının təhsil müəssisəsinin qarşısında ucaldılmasını bayrağa hörmətsizlik hesab edir: "Azərbaycan dövlətinin bayrağı bizim üçün müqəddəsdir. Ona görə də, Azərbaycan Dövlət Slavyan Universitetinin akt zalında bayrağımız üçün xüsusi yer ayrılıb. Bayrağı binanın qarşısında, küçədə asmaq ona qarşı hörmətsizlik olar. Mən bir çox ölkələrdə olmuşam. Müşahidələrimə əsasən deyə bilərəm ki, xarici ölkələrin əksəriyyətində ali məktəblərin qarşısında dövlət bayrağı asılmayıb". Hər bir dövlət müəssisəsinin qarşısında dövlət bayrağının asılmasını mənasız hesab etdiyini deyən prorektor Milli Parkdakı skamyaların üzərində dövlət bayrağının həkk olunmasınının da düzgün olmadığını vurğuladı.

Azərbaycan sənaye istehsalına görə MDB-də liderdir. Bu barədə məlumatı MDB Statistika Komitəsi ötən ilin yekunlarına həsr edilən hesabatda açıqlayıb. Komitənin məlumatına görə, 2007-ci ildə Azərbaycanda sənaye istehsalı 24 faiz təşkil etməklə MDB məkanında ən yüksək nəticə hesab edilir. Azərbaycan həmçinin ümumi daxili məhsulun həcminə görə də liderliyi qoruyub saxlayıb. Belə ki, ötən il ölkəmizdə bu rəqəm 25 faiz təşkil edib. Qırğızıstan və Belarusda ÜDM 8,2 faiz, Ukraynada 7,3, Rusiyada 8,1 faiz olub. İnflyasiya rəqəmlərinə görə isə, Qırğızıstanda 10,2 faiz, Ermənistanda 4,4 faiz, Tacikistanda 21,5, Rusiyada 11,9 faizlik inflyasiya qeydə alınıb.
   

Ötən il "Bakı" elektrik stansiyasında 476 milyon kVt/s elektirk enerjisi istehsal edilib. Bu isə proqnozlardan 62 milyon kVt/s çoxdur. Bu barədə məlumatı stansiyanın şöbə müdiri Ruslan İbrahimov verib. Onun sözlərinə görə, stansiyada 1300 tondan artıq şərti yanacağa qənaət edilib. Stansiyada soyuq hava şəraitində aqreqatların normal fəaliyyəti üçün tədbirlərin həyata keçirildiyini bildirən şöbə rəisi elektrik enerjisinə tələbatın artdığı soyuq günlərdə stansiyanın iş rejiminin pozulmadığını bildirib. Həmçinin qeyd edib ki, daxil olan qazın keyfiyyətini yaxşılaşdırmaq üçün qaz xətti üzərində seperator quraşdırılacağını vurğulayıb.
   

Yaradıcı şəxslərin sosial müdafiəsini gücləndirmək məqsədilə bir sıra tədbirlərin həyata keçirilməsi nəzərdə tutulur. Milli Məclisin mədəniyyət məsələləri daimi komissiasından verilən məlumata görə, bu məqsədlə "Yaradıcı şəxslər və yaradıcılıq ittifaqları haqqında " qanunda xüsusi maddə əksini tapıb. Belə ki, qanun əsasən yaradıcı şəxslərin yaradıcılıq fəaliyyətini və sosial müdafiəsini təmin etmək məqsədilə müvafiq icra hakimiyyəti orqanı tərəfindən yaradıcılıq fəaliyyəti növləri üzrə xüsusi təqaüd fondları yaradılacaq. Yaradıcı şəxslərə fəxri adlar, fəxri təqaüdlər və mükafatlar isə əvvəl olduğu kimi mövcud qanunvericilikdə müəyyən olunmuş qaydada veriləcək.
   
   

Dövlət Əmlakının İdarə Edilməsi üzrə Dövlət Komitəsi tərəfindən cari ildə dövlət müəssisə və təşkilatlarının əmlaklarının və istifadəsində olan torpaq sahələrinin texniki inventarlaşdırılması həyata keçiriləcək, texniki pasportların və planlarının tərtib edilməsi təmin olunacaq. Komitədən verilən məlumata görə, artıq Bakı şəhəri də daxil olmaqla bir sıra rayon və şəhərlərdə bu istiqamətdə işə başlanılıb. İnventarlaşdırmanın yekunu olaraq daşınmaz əmlakın və torpaq sahələrinin texniki parametrlərini, əmlakın ünvanı, mülkiyyətçisi, texniki göstəricilərin təsnifatı, obyektin istifadəsində olan torpaq sahəsinin hüdudları barədə məlumatı özündə əks etdirən Texniki Pasport tərtib ediləcək. 2007-ci ildə Dövlət Əmlakının İdarə Edilməsi üzrə Dövlət Komitəsi tərəfindən respublika üzrə 5000-ə yaxın dövlət müəssisə və təşkilatın əmlakı və istifadəsində olan torpaq sahəsinin inventarlaşdırma işləri aparılıb. İl ərzində aparılmış inventarlaşdırma işləri 3 milyon kvadratmetrə yaxın dövlət mülkiyyətində olan bina və tikililərin, 45 milyon kvadratmetrə yaxın isə dövlət mülkiyyətində olan torpaq sahələrini əhatə edib. Aparılmış texniki inventarlaşdırma işləri nəticəsində 2500-ə yaxın Texniki Pasport tərtib edilib. Belə tədbirlərin həyata keçirilməsində məqsəd dövlət əmlakı və torpaq sahələrinin qorunub saxlanması və səmərəli istifadəsini təmin etməkdir.