"Azad Azərbaycan" teleradio şirkətinin anonslarından bəlli olduğu kimi, efir izləyiciləri tezliklə "N1 - İlin müğənnisi" adlı şou-layihəyə tamaşa edəcəklər. 106.3 Fm-in efir direktoru Emin Musəvinin hazırladığı proqram şou-biznes nümayəndələrini bir ailə kimi birləşdirəcək. Onların bir-birinə münasibətləri, iç dünyaları, insani keyfiyyətləri tamaşaçıların gözü qarşısından keçəcək. Eyni zamanda birinciliyə iddialı olan müğənnilərin kateqoriyalarını bu dəfə özləri deyil, tamaşaçılar müəyyən edəcək.
   Emin Musəvi bizimlə söhbətində vurğuladı ki, 7 məşhur kişi və 7 qadın müğənninin təmsil olunduğu layihə tezliklə efir həyatına başlayır. Layihənin məqsədi hər efir günü iki müğənnini duelə çıxarmaqdan ibarətdir. Onların şəxsi həyatı, yaradıcılıq prosesləri müzakirə olunacaq, eyni zamanda sənətçilərin mahnıları dinləniləcək. Efirin sonunda tamaşaçı SMS-ləri kimin birinci olduğunu müəyyən edəcək və müğənniyə özü ilə bir sənətçini növbəti mərhələyə aparmaq şansı veriləcək. Layihəni fərqləndirən məqamlardan biri onun tele-studiyada, canlı efirdə yayımı ilə bağlıdır. Emin Musəvinin əlavəsinə görə, layihə həm də tok-şou xarakteri daşıyacaq və burada tamaşaçılarla yanaşı, KİV nümayəndələri də səhnədə baş verənləri studiyadan izləyəcəklər. Burada tamaşaçıların aktivliyi nəzərdə alınacaq. Yəni iki düşərgəyə ayrılacaq şounun izləyiciləri iştirakçı barədə pis, yaxud yaxşı rəy formalaşdıracaqlar. Efir əməkdaşının məlumatına görə, layihədə müğənninin məşhurluğu bir o qədər rol oynamayacaq. Tamaşaçı SMS-ləri hətta ən məşhur simanı layihədən çox asanlıqla uzaqlaşdıra bilər. İştirakçının aktivliyi burada xüsusi rol oynayacaq.
   Layihə qalibinin hədiyyəsi üzərində bir neçə versiyada düşünülsə də, təşkilat komitəsi ənənəvi təqdimatlardan bir az kənara çıxmaq istəyib. Öyrəndik ki, əvvəlcə avtomobil, yaxud pul mükafatı üzərində düşünən təşkilatçılar sonda maraqlı ideya üzərində dayanıblar. Bu, minimum 35 sm hündürlüyündə qızıldan mikrofon fiquru olacaq. Hazırda bahalı əşya hazırlıq prosesindədir. Eyni zamanda "Azad Azərbaycan"ın həyətində ulduzlar alleyası salınacaq və ora qalibin şəkli həkk olunacaq: "Müğənnilər arasında həmişə kateqoriya mübahisəsi olub. Heç kim özünü 5-ci, yaxud 6-cı görmək istəmir. Sözügedən layihə tamaşaçılar vasitəsi ilə onlara öz yerlərini göstərəcək. Köhnə deyimlə "yaxşı ifaçını xalq müəyyənləşdirir" şüarını burada bir daha göstərməyə çalışacağıq".
   Qeyd edək ki, 4 aya yaxın vaxtı əhatə edəcək "N1 - İlin müğənnisi" layihəsinin iştirakçı siyahısı artıq tamamlanmaq üzrədir. Emin Musəvinin məlumatına görə, cümə günləri yayımı nəzərdə tutulan telelayihədə kişi müğənnilərdən Eyyub Yaqubov, Nadir Qafarzadə, İzzət Bağırov, Elnur, qadın müğənnilərdən isə İradə İbrahimova, Aygün Kazımova, Rəqsanə, Xatirə və başqaları iştirak edəcəklər.

Heydər Əliyev adına sarayın təmiri bir çox təşkilatçılar kimi Nahid Emiloğlunun iş qrafikini də aşağı salıb. Təşkilatçının "Mövqe"yə bildirdiyinə görə, restoran rəhbərliklərindən konsert təşkili üçün dəfələrlə təklif alıb: "Bunların heç birini dəyərləndirməmişəm. Çünki özümü restoran çərçivəsində çalışan təşkilatçı kimi görmək istəmirəm. Layihələrim Heydər Əliyev adına Saray, Yaşıl Teatrda təqdim olunub. Birdən-birə restoran səviyyəsinə düşə bilmərəm. Eyni zamanda bu mənim yaradıcılıq platformama yaxın deyil".
   Stadionlara da bir o qədər maraq göstərmədiyini deyən təşkilatçı Nahid Emiloğlu əlavə etdi ki, bir müddət konsertlərinin sayını axsatmağı düşünür: "Yeni ildə ilk konsert layihəm Tarkanın iştirakı ilə Yaşıl Teatrda keçiriləcək. Ola bilsin yay ayında həmin məkanda daha bir neçə konsert layihəm gerçəkləşdi. Sarayın təmirindən sonra proqramların sayını artırmağı düşünürəm".
   Yeri gəlmişkən qeyd edək ki, Tarkanın konserti üçün nəzərdə tutulan afişaların hazırlıqları başlayıb. Gələn aydan etibarən isə anonslar hazırlanacaq. Söhbət zamanı bəlli oldu ki, Nahid Emiloğlu ötən il barəsində danışdığı "Super star" layihəsinin üstündən xətt çəkib. Mahnı müsabiqələrinin sayının kifayət qədər olduğunu xatırladan təşkilatçı daha birinə lüzum olmadığını qeyd etdi. Xatırladaq ki, müsabiqənin münsiflər heyətində türkiyəli Çelik və Ercan Saatçinin təmsil olunacağı bildirilmişdi.
   

Xalq artisti İlhamə Quliyeva səhnə fəaliyətinin 40 illiyinə həsr olunmuş hesabat konserti verəcək. Bu barədə danışan müğənni konsertin yerini hələ müəyyənləşdirmədiyini bildirib: "Heydər Əliyev adına saray təmirə dayandığından konsert proqramını keçirmək üçün başqa yer axtarıram. Bu hesabat konsertini ötən ilin yayında keçirmək istəyirdim. Ancaq səhhətimlə əlaqədar konserti bu ilə saxladım. Konsertimdə xeyli sürpriz olacaq".
   1994-cü ildən bəri 10-a yaxın diski işıq üzü görən Xalq artisti piratlarla mübarizə aparmaqdan yorulduğunu bildirib: "Mən nə klip çəkdirmək, nə də disk buraxmaq arzusundayam. İndiyədək işıq üzü görən disklərimin xeyrini, bəhrəsini piratlar görüb. Mən də sənətimə və özümə hörmət edərək heç bir disk buraxmıram. Hər oxuduğum yeni mahnını piratların oğurlayacağını düşünürəm".
   

Muğam sənətinə yeni Qarabağ nəfəsi gətirən Xalq artisti, professor Arif Babayev fevralın 20-si 70 yaşını tamamlayır. Qarabağ torpağının çoxsaylı istedadlılarından olan sənətkar hələ cavanlıq illərində Xan Şuşinski, Zülfü Adıgözəlov, Mütəllim Mütəllimov, Seyid Şuşinski sənətindən bəhrələnib, muğamın sirlərinə yiyələnib.
   Qeyd edək ki, yubilyarın 70 yaşının dövlət səviyyəsində qeyd olunması nəzərdə tutulub. Mədəniyyət və Turizm Nazirliyinin mətbuat əlaqələndiricisi Zöhrə Əliyeva yubileyin sənətkarın adına layiq şəkildə keçiriləcəyini söylədi. O, tədbirin mart ayına nəzərdə tutulduğunu diqqətə çatdırdı.
   

"Lider" telekanalının anonslarından bəlli olduğu kimi, fevralın sonunda Əməkdar artist Brilliant Dadaşovanın "Mən sənətkaram" adlı müəllif verilişi efirə çıxacaq. Müğənninin mətbuat əlaqələndiricisinin qəzetimizə bildirdiyinə görə, hər həftə tamaşaçıların görüşünə gələcək telelayihənin hazırlıq prosesi gedir. Amma mətbuat xidməti ssenari barədə geniş açıqlama vermədi. Onun sözlərinə görə, verilişin nüansları, formatı barədə ilk buraxılışı izlədikdən sonra məlumat almaq mümkün olacaq. Brilliant xanım müəllif verilişində əsas diqqəti musiqiyə verəcək.
   Xatırladaq ki, bir çox müğənnilər özlərini teleaparıcı kimi sınayıblar. Amma nədənsə, həmin verilişlərin ömrü 2-3 aydan artıq olmayıb. Brilliant xanım ölkəmizdə yeganə müğənnidir ki, beş il ərzində - 2000-2005-ci illərdə "Speys" telekanalında "Gözəllik dünyanı xilas edəcək" müəllif verilişinə aparıcılıq edib.
   

Ölkəmizdə "Nəsimi" Milli Ədəbiyyat Müsabiqəsinin keçirilməsinə start verilib. Müsabiqənin keçirilməsində məqsəd yeni istedadların, uğurlu bədii mətnlərin üzə çıxarılması, təbliği və dəyərləndirilməsi, eləcə də cari ildə çap olunmuş dəyərli əsərlərin qiymətləndirilməsindən ibarətdir.
   Qeyd edək ki, ədəbi müsabiqənin təsisçiləri Azərbaycan mədəniyyəti və Azərbaycan ədəbiyyatı portallarıdır. Müsabiqənin təşkilat komitəsindən verilən məlumatda bildirilir ki, ədəbi yarış iki mərhələdə keçiriləcək. Fevral-may aylarını əhatə edəcək 1-ci mərhələyə bu günədək kitabı dərc olunmayan gənc müəlliflər, yeni imzalar qatıla bilər. Müsabiqə həm şeir, həm də hekayə nominasiyaları üzrə keçirilir. Hər iki nominasiyada I yerin sahibləri üçün təşkilatçılar tərəfindən şəxsi sayt yaradılacaq. Bu mərhələnin qalibləri mayın 28-də elan olunacaq. Müsabiqənin ikinci mərhələsində isə il boyu dərc olunan əsərlər, kitablar, tərcümələr dəyərləndiriləcək və onların arasından ən yaxşıları seçilərək mükafatlandırılacaq. Qaliblərə "Nəsimi" mükafatı və diplom təqdim ediləcək.
   

"Salnamə" studiyasında dövlət sifarişi ilə hazırlanan növbəti film "Dua" adlanır. Mədəniyyət və Turizm Nazirliyinin mətbuat əlaqələndiricisinin məlumatına görə, ekran işi Xocalı soyqırımının 16-cı ildönümünə həsr olunub. Məlumatda bildirilir ki, 12 dəqiqəlik film bir neçə xarici dilə tərcümə olunub. Fevralın 26-da Xarici İşlər Nazirliyinin xətti ilə Azərbaycanın xarici ölkələrdəki səfirliklərində, Xaricdə Yaşayan Azərbaycanlılarla İş üzrə Dövlət Komitəsinin təşkilati dəstəyi ilə diaspor təşkilatlarında və respublikanın şəhər və rayonlarında filmin təqdimatı nəzərdə tutulub. Mətbuat xidməti əməkdaşının sözlərinə görə, "Dua" filminin televiziya kanalları ilə nümayişi də nəzərdə tutulub. Qeyd edək ki, filmin rejissoru Ziya Şıxlinski, ssenari müəllifi Yusif Şeyxov, operatoru Rafiq Quliyevdir.