Vaxtilə milli rəqqasələrin şahzadəsi titulunu verdiyimiz Əminə Dilbazi bu gün nə rəqsdən danışır, nə də rəqqasələrdən. Ömrünün son akkordlarının ritmini dinləyən rəqqasə xanım artıq şahlıq hökmünün heç bir işə yaramadığını dilə gətirdi. Dörd divar araxasında, həyat yoldaşı Cövdət Hacıyevin fotoları ilə başbaşa qalan Əminə xanım "artıq taleyin acı oyununu oynayıram" deyir. İndi onu alqışlayan nə yüzlərlə tamaşaçısı var, nə də ətrafında süzən nazənin qızlar. Bir sözlə, Xalq artisti Əminə Dilbazi meydanda tək qalıb. Rəqqasə qəzetimizə müsahibəsində tənhalığının düşüncələrini bizimlə bölüşdü:
   - Oturduğumuz bu otağı muzeyə çevirmişəm. Yəni sağlığımda özümün muzeyimi yaratmışam ki, hərdən keçmişimlə baş-başa qalıb, darıxmayım. Ağlıma gətirməzdim ki, insan yaşlananda təklənər, bu qədər darıxar. Çox darıxıram. Amma bilmirəm nə üçün darıxıram. Hərdən həyatımı bölüşdüyüm Cövdət Hacıyevin divardan mənə boylanan şəkillərinə baxır və düşünürəm. Düşünürəm ki, insan nəyə lazımdır? Əgər mən səhnəyə, sənətə lazım deyiləmsə, unudulmalıyam? Məni səhv başa düşməyin. Bu sözləri maddiyyat üçün söyləmirəm. Mənim pula ehtiyacım yoxdur. Axı pulu neyləyəcəm? Mənim diqqətə, qayğıya ehtiyacım var. Bunu düşündükcə ürəyim sıxılır. Adi günləri birtəhər keçirirəm. Amma bayram günləri gələndə ürəyimin ritmi artır, təzyiqim sözümə baxmır. Qulağım səsdə, gözüm qapıda qalır. Bayram günü kimin yadına düşəcəm, bu haqda düşünürəm. Lakin bunlar heç nəyi həll etmir. Heç kim bayramımı təbrik edəcək qədər diqqətli olmur. Hətta, xoş sözləri məndən əsirgəyirlər. Hərdən özüm-özümə deyirəm: bəlkə məni ölmüş bilirlər. Axı heç yanda səsim gəlmir, adım çəkilmir. Düşünürlər ölmüşəm, ona görə yada düşmürəm.
   - Vaxtilə ekranlardan düşməyən, rəqqasələrin sevimli müəllimi olan Əminə xanımı yetirmələri də unudub?
   - Ad günüm yetişəndə tələbələrim tort, şirniyyat əllərində evimdə olurdular. Artıq buna adət etmişdim. Diqqətləri həmişə üzərimdə olub. Amma zaman keçdi, mən tamamilə səhnədən, məktəbdən ayrıldım. Yaşlandığım üçün bunları yerinə yetirə bilmirdim. Elə o vaxtdan bəri təklənməyə başladım.
   - Gəzintiyə çıxıb, fikrinizi dağıtmaq istəmirsiniz?
   - Necə çıxım? Bir neçə gün əvvəl yıxılıb ayağımı əzmişəm. Ümumiyyətlə, hərəkətlərimdə problem var. Tək yeriyə bilmirəm. Ayaqlarım sözümə baxmırdı, yıxılandan sonra vəziyyət daha da gərginləşib.
   - Gileyiniz daha kimlərədir?
   - Mən sözümü deyirəm, kim istəyir payını götürsün. Əgər qapımı heç kim açmırsa, kimi tərifləyə bilərəm. Sənətdən söz düşəndə filan-filan rəqs nümunələrinin tarixindən danışırlar. Amma fikirləşmirlər, onların yaranmasında, inkişafında Əminə Dilbazinin rolu az olmayıb. Düzdür, Xalq artisti fəxri adını almışam, "İstiqlal" ordeni ilə təltif olunmuşam. 20-dən çox ölkədə Azərbaycan rəqslərini nümayiş etdirmişəm. Yüzlərlə tələbə yetişdirən bu şəxsiyyət necə olur unudulur? Çox təəssüflə qeyd etmək istəyirəm ki, sənətkar dünyasını dəyişəndə onun haqqında ağızdolusu danışırlar - sənətdə böyük töhfələri olan, misilsiz xidmətlər göstərən filankəs. Mənim haqqımda da bu cür danışacaqlarına inanıram. Amma bu gün kiminsə qapımı döyəcəyinə artıq inamım qalmayıb. Axı Əminə Dilbazi bir də dünyaya gəlməyəcək. Onun qədrini bilmək lazımdır.
   - Maddi durumunuz necədir? Dediniz sıxıntınız yoxdur.
   - Etiraf edim ki, maddi cəhətdən ehtiyacım yoxdur. Prezident təqaüdü alıram. Bu mənə bəs edir. Arabir dərmanlar qəbul edirəm. Bu da təbiidir. Yaşlanmışamsa, səhhətimdə problemlərin olması normaldır. Amma yalandan deyim maddi sıxıntılar keçirirəm, bunu adıma sığışdırmaram. Cavanlığımda səhnəyə çıxırdım və həmişə pula ehtiyacım olub, yaxşı da qazanmışam. Amma indi sənətdən uzaq olduğum üçün tələbatım da yoxdur.
   - Hansı dövrlər üçün daha çox darıxırsınız?
   - 30 il səhnədə rəqs etmişəm. Hindistanda mənə "Şiva rəqqasə" adı veriblər. Bu ad orada çox önəm daşıyıb və həmin sənətkarın yeri yüksəkdə olur. Əgər bu yaşımda orada olsaydım, yenə şahzadə kimi yaşayardım. Hərdən oyunlarımı xatırlayıram. Rəqs oyunları arasında ən çox sevdiyim "Turacı" olub. Bu oyun mənim üçün bir başqa idi. Özümü başqa aləmdə hiss edirdim. Bütün uğurlarımı əziyyətlərim hesabına qazanmışam. Gecələri yatmırdım, məşqlərimi tamamlayır, səhər açılan kimi onu tələbələrimlə bölüşürdüm. Çox məsuliyyətli olmuşam. Əgər vaxtlı-vaxtında işimi yerinə yetirməsəydim, kim idi mənə Xalq artisti adını verən. Heç bu zirvəyə çata bilməzdim. Ona görə də indiki vəziyyətim məni məyus edir.
   - Bir neçə cümlə ilə milli rəqs sənətinin bugünkü dövrünü necə xarakterizə etdiyinizi öyrənmək istəyirəm.
   - Mən bu barədə çoxdandır ki, danışmaq istəmirəm. Çünki demokratiya çoxlarının əlinə fürsət verib. Bu gün milli geyimlə səhnəyə çıxan sabah göbəyini, ətəyini açır. Belə halları sənətə yaraşdırmıram. Mənim deməyimlə heç nə dəyişən deyil. Ona görə də susuram.
   

Almaniyanın Bakıdakı səfirliyi və Alman-Azərbaycan Mədəniyyət Birliyinin təşkilatçılığı ilə fevralın 29-da "Kapellhaus"da Almaniyanın məşhur caz qrupu "Lionel hass trio" konsert verəcək. Konsert mərkəzindən aldığımız məlumatda bildirilir ki, Mixaela Ştaynhauer (vokal), Lionel Hass (piano), Andres Hentsedən (bas) ibarət qrup üzvləri məşhur alman bəstəkarlarının əsərlərini səsləndirəcəklər. Qeyd edək ki, konsertdə saksafon ifaçısı Rain Sultanov da qrupun tərkibində çıxış edəcək.
   

Heydər Əliyev Fondunun dəstəyi ilə bir müddət əvvəl keçirilən "Muğam Müsabiqəsi-2007"-nin qaliblərindən olan Nasir Ətapur haqqında gəzən şayiələrə aydınlıq gətirdi. Xatırladaq ki, əslən Təbrizdən olan N.Ətapur müsabiqə yekunlaşandan dərhal sonra valideynlərinə baş çəkmək məqsədi ilə ölkəni tərk etmişdi. Xanəndənin hələ də özünə məlum olmayan səbəblərdən onun mənşəyi gündəmə gətirildi və buna siyasi don geyindirildi. Söz gəzdi ki, guya xanəndə gömrükdən keçərkən iranlılar ona təzyiq göstəriblər. Hətta 30 şallaq vurulandan sonra onun vəziyyətinin ağır olduğu xəbərləri yayılmışdı. Xəbərləri təkzib edən Nasir Ətapur bildirdi ki, ona nəinki gömrük məntəqəsində, ümumiyyətlə, İranda heç kim güldən ağır söz deməyib.
   "Əslində 20 il əvvəl İrana get-gəl qaydasında deyildi. Qardaş bacının, qohum əqrəbasının üzünə həsrət idi. İndi ağır şərtlər aradan qaldırılıb və biz istədiyimiz vaxt qohumlarımızın yanında ola bilirik. Haqqımda gəzən şayiələr isə həqiqətdən kənardır. Müsabiqədən sonra Təbrizə gedəndə böyük şadyanalıqla qarşılandım. Bunu əvvəlcədən gözləmirdim. Biləsuvar sərhədini keçəndən sonra məni Təbriz Mədəniyyət Evinin rəhbərliyi və işçiləri qarşıladılar. Bayram əhvalı ilə valideynlərimin evinə yetişdim. Həmin gündən başlayaraq mənim şərəfimə ziyafətlər təşkil olundu. Ümumiyyətlə, əvvəlcədən əhd etmişdim ki, müsabiqədən uğurla keçsəm, Aşuranı Təbrizdə keçirəcəm. Əhdimə çatdım. Aşuradan sonra bələdiyyə rəhbərliyi və bir çox qurum nümayəndələri mənim üçün şam ziyafəti təşkil etdilər. Muğam müsabiqəsindəki iştirakımı alqışlayan həmyerlilərim mənə çoxlu hədiyyələr təqdim ediblər".
   Tələbələrin qış tətilini İranda keçirən N.Ətapur fevralın birinci ongünlüyündə Bakıya qayıtdığını söylədi. Azərbaycan Milli Konservatoriyasında Xalq artisti Arif Babayevdən muğam dərsi aldığını bildirən N.Ətapur sənətini Azərbaycanda davam etdirməyi düşündüyünü söylədi: "Muğam sənəti Azərbaycanda yüksək inkişaf edib. İranda muğamın bu qədər bilicisi və ifaçısı yoxdur. Bu qənaətə gəlmişəm ki, peşəmi burada davam etdirim və sənətin sirlərinə yiyələnim".
   
   

"Natiq" ritm qrupunun səfərlər proqramı bu il daha sıx olacaq. Qrupun rəhbəri Natiq Şirinovun bildirdiyinə görə, qrupun yeni repertuarını yaxın hətfələrin birində misirlilər dinləyəcəklər. Musiqiçi heyəti gələn həftənin ilk günü yola düşəcək və Misirdə bir günlük proqramla çıxış edəcək. Martın 5-də Bakıya qayıdacaqlarını deyən N.Şirinov tezliklə növbəti səfəri gerçəkləşdirəcəklərini söylədi: "Növbəti çıxışımız Almaniyada nəzərdə tutulub. Əvvəlcə orada qrup şəklində çıxışımız olacaq. Daha sonra musiqiçilərlə birgə Bakıya qayıdıb yenidən Almaniyaya üz tutacağam. Bu dəfə Alim Qasımovu müşayiət etmək üçün bir həftə Almaniyada səfərdə olacağam".
   

Əməkdar artist Tünzalə Ağayeva sözləri millət vəkili Qənirə Paşayevaya aid olan "İllərə yalvardım" mahnısının klip çəkilişlərini bitirib. Mart ayının əvvəlində klip tamaşaçıların ixtiyarına veriləcək. Bu barədə məlumat verən T.Ağayeva Q.Paşayeva ilə dost münasibətində olduqlarını deyib.
   Söhbəti zamanı müğənni əlavə etdi ki, növbəti yaradıcılıq proqramını səfəri təşkil edəcək. Müğənni əlavə etdi ki, bu həftənin bazar günü o, Yekaterinburqda konsert proqramı ilə çıxış edəcək. Konsertdə onunla eyni səhnəni Aybəniz Haşımova, Ədalət Şükürov, "Cəngi" rəqs ansamblı və gənc xanəndələr bölüşəcəklər. Öyrəndik ki, konsert diasporun xətti ilə təşkil olunub.

Bir müddət əvvəl bacısı Nazpəri Dostəliyeva ilə soyuq müharibəyə başlayan bacısı, müğənni Zeynəb Dostəliyeva hələ sülh bayrağı qaldırmağa tələsmədiyini söylədi. Eyni zamanda müğənni televiziya kanallarının ona ögey münasibətdə olduğunu etiraf edib: "Hazır klipim, musiqi çarxlarım var. Amma onları nümayiş etdirmək üçün telekanallar imkan yaratmırlar. Dəfələrlə müraciət etmişəm, amma mənə susaraq cavab verirlər. Bacımla isə münasibətlərimiz qaydasına düşməyib. Ümumiyyətlə, bu mözunu bağlamağı düşünürəm. Çünki bir müddət əvvəl mən bacımdan imtina etdiyim barədə məlumat vermişəm. Artıq onun haqqında danışmaq istəmirəm. Yaradıcılığıma gəlincə, iki albom hazırlayıram və onların ekran həyatını düşünürəm. Əgər əlimdə olan hazır materialları kanallar yayımlasa, tezliklə yeni klipimi çəkdirməyi düşünürəm".