Rusiyanın Moskva şəhərində keçirilən "Aeroflot open" festivalının səkkizinci turunda Azərbaycan şahmatçısı Qadir Hüseynov turnirin lideri, rusiyalı Aleksey Dreyevlə görüşdə heç-heçə oynamışdır. Həmyerlilərimiz arasında hələlik ən yaxşı nəticə göstərmiş Q.Hüseynov 5,5 xalla mövqeyini qoruyub saxlaya bilmişdir. Beynəlxalq qrossmeyster Rauf Məmmədov 5 xalla turnir cədvəlinin 12-ci, dünya və Avropa çempionu Eltac Səfərli isə 4,5 xalla 29-cu pilləsində qərarlaşmışlar. Azərbaycan şahmatçısı, beynəlxalq qrossmeyster Qadir Hüseynov 66 iştirakçı arasında 4-8-ci yerləri bölüşmüşdür. İsveçrə sistemi üzrə keçirilən turnirin doqquzuncu turunda İsrail təmsilçisi Maksim Rodşteynlə oyunda heç-heçə edən Q.Hüseynov nəticədə 6 xal toplamışdır. A1 turnirində iştirak edən Azərbaycanın digər təmsilçisi beynəlxalq qrossmeyster Rauf Məmmədov yarışları 9-cu, dünya və Avropa çempionu Eltac Səfərli isə 36-cı pillədə başa vurmuşdur.