"İnternetdə narkotik istifadə etməyimlə bağlı yerləşdirilən videogörüntünü izləyərkən, çox məyus oldum. Belə bir hadisənin baş verəcəyini gözləmirdim". Bu sözləri reper Hüseyn Dərya narkotik istifadəçisi olduğunu və bundan qurtula bilmədiyini etiraf edən videogörüntülərin yayılmasına münasibətini bildirərkən deyib. Bu barədə reperin mətbuat əlaqələndiricisi qəzetimizə məlumat verib. Məlum bəlaya düçar olduğunu gizlətməyən reper sözünün davamında bunları qeyd edib: "İnsanın hər hansı bir vasitə ilə alçaldılmasını yaxşı hal hesab etmirəm. Hər birimizin həyatında xoşagəlməz, ağır günlər olur. Mənim də başıma bu cür bəla gəldi. Artıq bir çox insanlar şəxsi həyatımda hansı problemlər yaşadığımdan agahdır. Bir müddət əvvəl yol qəzasına düşdüm və bunun ardınca şəxsi həyatımda xoşagəlməz hadisələr yaşadım. Bunların təsiri altında olarkən həm yaradıcılığımdan uzaqlaşdım, həm də özüm özümdən. Nəticəsi də bu gün düşdüyüm durum oldu. Həm həyat yoldaşımı, həm oğlumu, həm də pərəstişkarlarımı məyus etmişəm. Problemlərdən özümü azad etməyə çalışarkən, işin bu yerə çatacağını ağlıma belə gətirmirdim. Bu vəziyyətimdə qarşıma çıxan insanlar zəifliyimdən istifadə etməyə çalışdılar və xoşagəlməz görüntüləri lentə aldılar. Etiraf edirəm ki, mən iradəsizliyimin qurbanı olmuşam. Yayılan görüntülərə görə isə hər bir kəsdən üzr istəyirəm".
Reperin əlavəsinə görə, həmin kadrlar bu günlərdə deyil, bir müddət əvvəl lentə alınıb. Etirafla dolu kadrlar Hüseyn Dəryanın özündə güc taparaq bəladan müəyyən qədər də olsa, uzaqlaşmasına kömək edə bilib: "Artıq əvvəlki həyatıma qayıtmağa çalışıram. Həkim nəzarətindəyəm və müalicə kurslarına başlamışam. Hamını əmin etmək istəyirəm ki, Hüseyn Dərya videokadrlarda izlədiyinizdən bir qədər fərqlidir. Amma bu tezlikdə tamamilə sağalmağım mümkün deyil. Bir qədər zamana ehtiyacım var. Artıq ətrafımda yaxşı insanlar olacaq və ailəmlə, yaradıcılığımla məşğul olacağam. Dost saydığım bəzi insanlar tərəfindən aldadılmışam. Artıq bu səhvləri bir daha təkrar etməyəcəyəm". Sonda reper vurğuladı ki, yaxın günlərdə mətbuat konfransı keçirib məsələyə daha yaxından aydınlıq gətirəcək.
Qəzet 
Bu günlərdə saçlarına yeni düzüm verən estrada müğənnisi İradə İbrahimova xarici görünüşündə nəzərdə tutulan dəyişikliyin səbəbi olduğunu bildirdi. Müğənni hazırlığı qış aylarına qədər davam edəcək albomunu fərqli yozumda təqdim etməyi qarşısına məqsəd qoyub. Bu səbəbdən sənətçi xanım albomun foto-qalereyasını yeni və dəyişmiş görünüşü ilə bəzəməyi düşünür. Müğənninin bildirdiyinə görə, hazırda albom üçün nəzərdə tutulan mahnılar studiya yazılışı mərhələsindədir. Bura Gövhər Həsənzadənin bəstələri ilə yanaşı, gənc və eyni zamanda peşəkar bəstəkarların yeni musiqiləri yerləşdiriləcək. Gövhər xanımın orta ritmdə olan bəstəsini lentə yazdıran müğənni hazır məhsulu albomun təqdimatına kimi dinləyiciləri ilə tanış etmək istəyir. Albomun harada buraxılıcağına gəlincə, müğənni həm yerli, həm də xarici studiyalara güvəndiyini, lakin konkret qərar vermədiyini sözünə əlavə etdi. Müğənninin fotoçəkilişləri isə yaxın həftələrin birində rellaşacaq: "Saç düzümü, geyimlərim fərqlilik təşkil edəcək. Hazırda stilistlə bu istiqamətdə çalışırıq. Tamaşaçılarım eyni görünüşü oktyabrda çəkilişi nəzərdə tutulan klipimdə də izləyəcəklər. Lakin hələlik mahnılar arasında seçim aparılmayıb".