Ötən həftə 75 yaşı tamam olan Xalq artisti, "İstiqlal" ordenli bəstəkar Arif Məlikov doğum gününü geniş çevrədə qeyd etməyib. Dostlar tərəfindən yad edilsə də, o, təmtəraqlı təkliflərdən imtina edərək yubileyini ailə üzvləri ilə birlikdə qeyd edib. Bəstəkarın bildirdiyinə görə, həmin gün dövlət televiziyasında çəkilmiş sənədli film nümayiş olunub.
   Son illər musiqi aləmində cərəyan edən hadisələrdən gileyli olan bəstəkar söhbətində bu mövzuya toxundu. Bəstəkarın bildirdiyinə görə, Azərbaycanda notlu kitabların çapını həyata keçirən mərkəzlər olmadığı üçün bu gün bəstəkarlar böyük problemlər yaşayırlar. Onun fikrincə, müəllimlərə həmin not yazılarını əldə etmək bir o qədər çətin olmasa da, tələbələr bunun əziyyətini çəkirlər. Bu səbəbdən yeni əsərlər nota köçürülsə də, kitab həllini tapa bilmir. Bunun aktual məsələlərdən biri olduğunu diqqətə çatdıran bəstəkar dövlətin yardımına ehtiyac duyulduğunu diqqətə çatdırdı: "Gənc tələbələr arasında maraqlı və dünya miqyasına çıxarılacaq əsərlər yazılır. Lakin onları böyük orkestlərə, məktəblərə təqdim etmək üçün tirajlanmalıdır. Çap mərkəzinin olmaması işimizi çətinləşdirir".
   Yaradıcılıq planlarından söz salan 75 yaşlı bəstəkarın "Yusif və Züleyxa" adlı əsərin musiqi versiyasını yazmaq kimi böyük arzusu var. Vaxtilə "Fərhad və Şirin"in musiqi həllini qarşısına məqsəd qoyan bəstəkar buna nail olub. İndi isə o, sözügedən musiqili əsər üzərində çalışır. Lakin onu narahat edən bir məqam var: "Mən bu işə plan xatirinə baxmıram. Ona görə narahatam ki, ömür onu başa çatdırmağım üçün imkan verməz. Hərdən bunu düşünürəm və məyus oluram. Amma vaxtdan asılı insan olmadığım üçün əsəri başa çatdıracağıma əminəm. Əsərin mövzusu bu günümüzlə səsləşir və böyük səs-küy yaradacağına əminəm".
   

Xalq artisti Nazpəri Dostəliyeva son aylar tənbəlləşdiyini etiraf etdi. Bir sıra yaradıcılıq planlarına başlasa da, onları yarımçıq qoyan müğənni, nəhayət, bu qənaətə gəlib ki, onda tənbəllik elementləri baş qaldırıb. Hər hansı hadisənin təsiri altına düşmədiyini vurğulayan müğənni bunun səbəblərini başqa məqamlarda axtarmağa çalışdı: "Mənə elə gəlir ki, yayın bərk istilərinin təsiri nəticəsində bu vəziyyət yaranıb. Əslində, bu cür təbiətə xas insan olmamışam. Əgər planlaşdırdığım iş bu gün üçün nəzərdə tutulubsa, onu mütləq yerinə yetirməli idim. Amma son aylar xarakterim bir qədər dəyişib. Günü-günə satıram. Amma bu gedişlə bir çox vədlərim havadan asılı qalacaq".
   Özündə güc toplamağa çalışan müğənni öncə yarımçıq qalan albomunu tamamlayacağını bildirdi. Onun sözlərinə görə, yeni toplunu köhnələrdən fərqləndirən bir sıra cəhətləri var. Belə ki, albomda nəzərdə tutulan mahnılar yalnız aşıq musiqilərindən ibarət olacaq: "Atam aşıq olub və ondan mənə keçən aşıqlıq istedadı var. Bir vaxtlar repertuara aşıq Alının sözlərinə yazılmış maraqlı kompozisiyanı daxil etdim və bu mənə uğur gətirdi. Uzun fasilədən sonra silsilə aşıq havaları yazdırmaq qərarına gəldim. Artıq 2 mahnı yazılıb və digərləri studiya həllini gözləyir. Qəti qərara gəlmişəm ki, bu həftədən etibarən onların studiya yazılışını başa çatdırım". Nazpəri xanımın əlavəsinə görə, albomda onun əksini göstərən şəkillər də mahnıların tərzi ilə uyğunluq təşkil edəcək. Müğənni toplunu payız aylarında təqdim etməyi düşünür.
   

Yolu tez-tez Hollivuddan düşən Xalq artisti İlhamə Quliyeva hətta qarderobunu təzələmək üçün ölkənin sərhədlərini keçir. Ötən ay ad günü ərəfəsində gəzintiyə çıxan müğənni bu niyyətini yenidən təkrarlamağa qərar verib. Lakin bu dəfə o, Hollivudun məşhur markalarını təşkil edən mağazalarda pul xərcləməklə yanaşı, səs imknalarını da yerli əhaliyə nümayiş etdirəcək. İlhamə xanımın bildirdiyinə görə, səfər sentyabrın sonlarına təsadüf edir. Müğənni bu ayın 26-da Hollivudun 1000 nəfərdən artıq tamaşaçı tutumu olan konsert salonlarının birində geniş proqramla çıxış edəcək. İki saata yaxın davam edəcək musiqili proqramda tamaşaçılar Azərbaycanın xalq və bəstəkar mahnılarını dinləyəcəklər. Bundan əvvəl isə İlhamə Quliyeva paytaxt ərazisində prezident seçkiləri ilə əlaqədar tədbirlərdə çıxış edəcək. Həmin tədbirlərdə müğənnilərdən Röya, İlqar Muradov, Faiq Ağayev, Elnur Hüseynov və Samir Cavadzadə ilə birlikdə oxuduqları və klip şəklində hazırlanan "Sən qalib gələcəksən" mahnısını təqdim edəcəklər.
   

Muzey Mərkəzində Xalq rəssamı, mərhum Nadir Qasımovun 80 illiyinə həsr olunmuş yubiley sərgisi açılıb. Mədəniyyət və Turizm Nazirliyinin təşkil etdiyi sərgidə rəssamın 80-ə yaxın əsəri sərgiyə çıxarılıb. Bu barədə nazirliyin mətbuat katibi İntiqam Hümbətov məlumat verib. Qeyd edək ki, N.Qasımov gənc yaşlarından etibarən beynəlxalq və respublika əhəmiyyətli sərgilərin fəal iştirakçısı olub.
   

Milli Kulinariya Mərkəzi növbəti festivaldan qayıdıb. Kulinarlarımız Qazaxıstanın Buraboy şəhərində keçirilən Beynəlxalq Milli Mətbəx Festivalında iştirak ediblər. Bu barədə qəzetimizə mərkəzin mətbuat əlaqələndiricisi məlumat verib. Xəbərdə bildirilir ki, festivalda Azərbaycan milli komandası festivalın əsas mükafatına layiq görülüb. Bu günlərdə isə Milli Kulinariya Mərkəzində komandanın yarışa hazırladığı karvinq, art-teybl adlı süfrə işləri nümayiş etdiriləcək.
   

Firudin bəy Köçərli adına Uşaq Kitabxanasının nəşr etdirdiyi "Göy qurşağı" jurnalının yubiley nömrəsi işıq üzü görüb. Yubiley nömrəsində kitabxana tərəfindən keçirilmiş "Mənim rəng dünyam" rəsm müsabiqəsinin qalibləri haqqında məlumat verilib. Uşaq Kitabxanasından bildirilib ki, SSRİ Xalq artisti, Azərbaycan teatr sənətinin inkişafında əvəzsiz xidməti olan Mirzəağa Əliyevin 125 illik yubileyi ilə əlaqədar topluda onun haqqında da material dərc olunub.
   

Şuşa Dövlət Musiqili Dram Teatrı növbəti mövsümün açılışını keçirib. Bu barədə qəzetimizə teatrın direktor müavini Azad Məmmədov məlumat verib. Onun sözlərinə görə, açılış günü teatr yeni səhnələşdirdiyi "Qız atası" tamaşasını nümayiş etdirib. Qeyd edək ki, səhnə əsərinin rejissoru Nazir Rüstəmov, rəssamı Nazilə Əhmədova, musiqi tərtibatçısı Azad Məmmədovdur. Öyrəndik ki, tamaşada rolları Şükufə Musayeva, Teymur Məmmədov, Aybəniz Əhmədova və başqaları oynayırlar.
   

Bu günlərdə Qazaxıstanın Aktau şəhərində "Xəzər dostluq dənizidir" başlığı altında Xəzəryanı dövlətlərin festivalı keçirilib. Festivalda vilayətin dəvəti ilə Sumqayıtın C.Cabbarlı adına Mədəniyyət evinin "Buta" xalq kollektivi iştirak edib. Bu barədə qəzetimizə Mədəniyyət və Turizm Nazirliyinin mətbuat xidmətindən məlumat verilib. Xəbərdə qeyd olunur ki, festivalda "Buta" kollektivinin iki üzvü rəngarəng ifalarına görə diplomlarla təltif olunub. Bununla yanaşı, kollektiv festivalın laureatı adına layiq görülərək, hədiyyə və pul mükafatı ilə təltif edilib.
   

Qubadakı kütləvi məzarlıqda aparılan arxeoloji qazıntı işləri başa çatıb. Arxeologiya və Etnoqrafiya İnstitutunun əməkdaşı, qazıntı ekspedisiyasının rəhbəri Qəhrəman Ağayev bildirib ki, 2007-2008-ci illər ərzində məzarlıqda iki arx və iki quyu qazılıb. Arxlarda aparılan qazıntılar zamanı çıxarılan kəllələrin sayı 211-ə çatıb ki, onlardan 22-si müxtəlif yaşlı uşaq, 24-ü qadın, qalanları isə əsasən yaşlı kişilərə məxsusdur. Bundan başqa, iki quyuda aparılan tədqiqatlar nəticəsində təxmini hesablamalara görə, 200-ə yaxın insan cəsədi olub. Q.Ağayev ilkin versiyaya görə, məzarlıqdakı insan cəsədlərinin sayının 400-dən çox olduğunu bildirib. Lakin ekspedisiya rəhbərinin sözlərinə görə, ərazidə sürüşmə olduğundan, vaxtilə burada məzarlıq olduğu bilinmədiyindən bir çox kəllələr çaya atılıb və yaxud torpağa qarışıb. Bu səbəbdən də məzarlıqda olan cəsədlərin sayını dəqiq müəyyən etmək çətin olub. Belə güman edilir ki, burada ümumilikdə 600-dən artıq insan cəsədi olub. Q.Ağayev onu da bildirib ki, yerli icra hakimiyyətinin ərazidə muzey yaratmaq ideyası həllinə yaxınlaşır. Belə ki, məzarlıqda qüllə tikiləcək və bu qüllədən gündə bir dəfə verilən fəryad səsi burada törədilən faciəni xatırladacaq.