Son illər meyxanaçı Namiq Qaraçuxurlunun bəstələrindən bəhrələnən Xalq artisti Aygün Kazımova fəaliyyət istiqamətini bir qədər dəyişib. Müğənni qış aylarına qədər hazır olacaq albomuna türk bəstəkarının mahnısını daxil edəcək. Müğənninin bildirdiyinə görə, həmin sənətçi Türkiyədə mahnıları ilə məşhur olan Aslı xanımdır.
   Gənc sənətçilərlə çalışan Aslı xanımın Aygün Kazımova ilə tanışlığının tarixi bir neçə ay əvvələ təsadüf edib. Müğənninin dostlarından birinin vasitəçiliyi ilə tanış olan sənətçi xanımlar işbirliyinə qərar veriblər və bir müddətdən sonra türkiyəli bəstəkardan Aygün xanıma yeni bəstə təqdim olunub. Aygün Kazımovanın əlavəsinə görə, Aslı xanımın peşəkarlıq səviyyəsi yüksəkdir və onun zəhmətinin haqqı qiymətləndirilib. Lakin o, qonorarın miqdarını açıqlamaq istəmədi.
   Albom hazırlığından söhbət düşəndə Aygün xanım mövzuya ürək yanğısı ilə yanaşdığını dedi: "Özümə söz vermişəm ki, yeni mahnılar albom şəklində buraxılmayana qədər mahnıları üzə çıxarmayacağam. Ona görə ki, sənətçilər arasında pirat hücumuna məruz qalanlardan biri də mənəm. Onsuz da sənətçilər Azərbaycanda albom satışından qazanc götürmürlər. Heç olmasa yaradıcılıq məhsulunun keyfiyyətinə zərər gətirməsinlər. Bundan əvvəlki albomlarım hazır olana kimi yeni mahnılarım səviyyəsiz şəkildə satışa çıxarılıb. Dəfələrlə təkrarlanan bu hadisə məndə piratlara qarşı böyük nifrət hissi oyadıb. Pul qazanmaq bir tərəfə qalsın, piratlar mahnının keyfiyyətinə də təsir göstərirlər. Mən onu üzə çıxaranda artıq eşidirəm ki, piratlar bunu aşağı səviyyədə yerinə yetiriblər. Ona görə də sonuncu albomumudan bir mahnı belə təqdim olunmayacaq. Mən başqa mübarizə üsulu bilmirəm. Biz sənətçilərin çıxışlarına məhəl qoyan yoxdur".
   

Xalq şairi, Azərbaycan Aşıqlar Birliyinin sədri seçilən Zəlimxan Yaqub konkret tələblərlə çıxış edib. O düşünür ki, cəmiyyət teleseriallara, mənasız verilişlərə aludə olub və milli dəyərlərini unutmağa başlayır. Milli dəyərlərin bir qolunu təşkil edən aşıq yaradıcılığını dolğunlaşdırmaq məqsədi ilə qurum rəhbəri yeni tələblərlə çıxış edib. Zəlimxan Yaqubun fikrincə, folklorumuzun qorunmasında həmin tələblər xüsusi rol oynayacaq: "İstəyimiz bundan ibarətdir ki, Aşıqlar Birliyinin iritutumlu yaradıcılıq binası olsun. Eyni zamanda konsert vermək üçün salona, kitabxanaya və tarixi muzeyə böyük ehtiyac var. Dövlətə bunların həyata keçirilməsi istiqamətində müraciət etməyi düşünürük. Ona görə ki, insanlara milli dəyərlərin aşılanması üçün çalışmalı və bunlara nail olmalıyıq".
   Aşıq sənətinin təbliğinin son illərdə ürəkaçan olmadığını dilə gətirən qurumun səlahiyyətlisi konsepsiya xarakterli proqram hazırlamağı düşünür. Eyni zamanda bura aşıqlara məxsus standart geyimlərin tikilməsi də qurum sədrinin planlarına daxildir: "Bir müddətdən sonra aşıqların geyimini eyni formalı tikililər təşkil edəcək. Yəni küçədə, tədbirlərdə onları müxtəlif yox, eyni, yəni üzvü olduqları qurumun təşkil etdiyi geyimlərdə görə biləcəksiniz".
   Söhbəti zamanı Xalq şairi aşıq sənətinə müxtəlif ölkələrdə olan diqqətdən danışdı. Amma o, təəssüflə qeyd etdi ki, bu təbliğatı azərbaycanlılar deyil, ermənilər aparırlar: "Almaniyada keçirdiyim əməliyyatdan bir neçə gün sonra dostlarımın təkidi ilə Münhen şəhərində gəzintiyə çıxdıq. Bir neçə dəqiqədən sonra mərkəzi küçədə aşıq dükanına rast gəldim. Özümdən biixtiyar yüksək səslə bunu ifadə etməyə başladım və dükana doğru addımladım. Dostlarım tez qolumdan yapışıb məni yolumdan saxladılar. Bildirdilər ki, həmin dükan azərbaycanlılara deyil, ermənilərə məxsusdur. Onlar saz alətlərini, aşıq geyimlərini və sənətə məxsus bir sıra əşyaları ermənilərin adı altında satışa çıxarıblar. Bu hadisə səhhətimi daha da pisləşdirdi. Dəhşətə gəldim ki, Azərbaycanın folklor sənəti vətəndaşlarının təbliğatsızlığı nəticəsində mənfurların adları ilə tanınır".
   Azərbaycan ərazisində fəaliyyətdə olan saz dükanlarının da vəziyyətini qənaətbəxş hesab etməyən Aşıqlar Birliyinin sədri bu istiqamətdə tövsiyələrini verdi: "Dükanlara daxil olursan, darısqallıq, şəraitsizlik adamı məyus edir. Bura turistlər, xarici iş adamları gəlirlər. Sazbəndlər onlara rahat şəraitdə xidmət göstərə bilmirlər. Dükanların vəziyyəti alıcının diqqətini ora cəlb etmir. Bu barədə də düşünməyin vaxtı yetişib".
   Zəlimxan Yaqub söhbətinin sonunda tövsiyələrini aşıqlara doğru yönəltdi. Aşıqların xalq yaradıcılığından lazımınca bəhrələnmədiyini deyən Xalq şairi onları mütaliəyə çağırdı: "Hərə öz sözü ilə çıxış etmək istəyir. Amma bu, hər bir kəsdə uğurlu alınmır. Onlara tövsiyə edərdim ki, əvvəlcə ədəbiyyatdan, ulu ustadlarımızın yaradıcılığından bəhrələnsinlər. Əgər yazmağı bacarırlarsa, öz sözlərinə oxusunlar. Əks təqdirdə sənəti ucuzlaşdırmasınlar".
   

Fəaliyyətinin 10 illiyi ərəfəsində olan "Dəyirman" rep qrupu yeni iddia ilə çıxış edib. Qrup üzvlərinin bildirdiyinə görə, Azərbaycanda fəaliyyət göstərən rep qrupları arasında uzunömürlüsü "Dəyirman"dır. Onlar bunu fəxrlə qeyd edərək sadiq dostlar olduqlarını vurğuladılar: "Düzdür, Anar işi ilə əlaqədar sıralarımızdan ayrıldı. Amma onun bu gedişi birdəfəlik olmadı. Lazımi vaxtlarda görüşüb birgə qərarlar qəbul edirik". Qrup üzvlərinin əlavəsinə görə, qrupun yubiley tarixi ilə əlaqədar olaraq təşkil olunacaq konsertdə bütün üzvlər bir araya gələcəklər. Rep dinləyiciləri çoxdan ifasını eşitmədikləri Anarı da dinləyəcəklər. Proqram üzərində çalışan "Dəyirman"çılar repertura bir sıra duetlər də daxil ediblər. Öyrəndik ki, qrup üzvlərinin Sevda Ələkbərzadə, Tünzalə Ağayeva və başqa müğənnilərlə duet mahnıları yazılacaq.
   

Azərbaycan kinematoqrafiyasının istehsalı olan üç film xarici ölkələrdə keçirilən festivallarda iştirak etmək imkanı qazanıb. Bir müddət əvvəl festivalların seçim turuna göndərilən filmlər müsabiqəsindən keçib və onlar geniş kütləyə təqdim olunacaq. Bu barədə qəzetimizə Mədəniyyət və Turizm Nazirliyinin kinematoqrafiya şöbəsindən məlumat verilib. Məlumata görə, Ziya Şıxlinskinin "Dua" sənədli filmi İssıkuldakı beynəlxalq sənədli filmlər festivalında nümayiş etdiriləcək. Mehriban Ələkbərzadənin "Məhkumlar" filmi ilə Ramiz Fətəliyevin "Hökmdarın taleyi" filmi isə "Qızıl minbər" bədii filmlər festivalında Azərbaycanı təmsil edəcək.
   

"Eurovision" uşaq mahnı müsabiqəsinin hazırlıq işləri davam edir. Lakin müsabiqədə Azərbaycanı təmsil edəcək azyaşlı ifaçının adı hələ bəlli deyil. "Eurovision"un Azərbaycan üzrə təşkilat komitəsinin məlumatında bildirilir ki, seçilən uşaqlar bir neçə aydan sonra məlum olacaq. Artıq müsabiqədə 16 ölkənin iştirakı dəqiqləşib. Hər ölkə 6 uşaqla təmsil olunacaq. Azərbaycanda seçimi qəlizləşdirən isə ifa olunacaq mahnının müəyyən olunmamasıdır.
   

Rejissor Eldar Quliyev növbəti filminin çəkilişinə başlayır. O, "İstanbul reysi" adlanan filminin çəkilişini reallaşdırmaq üçün sentyabrın 17-də İsmayıllı rayonuna səfər edib. Bölgədə nəzərdə tutulan çəkiliş prosesi həmin ayın son günlərinə kimi davam edəcək. Oktyabrın ilk günlərində isə çəkilişlər paytaxtda davam etdiriləcək. Yaradıcılıq işi barədə geniş danışmaq istəmədiyini bildirən kinorejissor hələlik bəzi məqamları dəqiqləşdirdiyini söylədi. Sözünə əlavə olaraq isə bildirdi ki, sözügedən filmin ssenari müəllifi Ramiz Fətəliyevdir. Qeyd edək ki, dövlət sifarişi olan "İstanbul reysi"nin çəkilişlərinin ilin sonuna kimi davam edəcəyi nəzərdə tutulub.
   

Bu günlərdə Şimali Kipr Türk Cümhuriyyətində "Yeniboğaziçi Pulya Festivalı" çərçivəsində beynəlxalq "Pulya" Karikatura müsabiqəsi təşkil olunub. 8 ölkədən 12 karikaturaçı rəssamın fəxri qonaq kimi dəvət olunduğu tədbirdə Azərbaycanı Karikaturaçı Rəssamlar Birliyinin sədri Bayram Hacızadə təmsil edib. Bu barədə qurumdan məlumat verilib. Xəbərdə qeyd olunur ki, tədbirdə karikatura janrının inkişafında və təbliğində göstərdikləri fəaliyyətə görə Rusiyadan Mixail Zlatkovski, Ukraynadan Vladimir Kazanevski, Türkiyədən Atila Özər, İsmail Kar, İtaliyadan Dalponte Paolo, Rumıniyadan Julian Pena Pai, Kristian Topan, Makendoniyadan Cordan Pop İliyev və Azərbaycandan Bayram Hacızadə festivalın gümüşdən hazırlanmış xüsusi mükafatına və xatirə hədiyyələrinə layiq görülüblər.