Dünən Bakı Əl Oyunları Sarayında Azərbaycan Qadınlarının III Qurultayı öz işinə keçirildi. Qurultaya ölkənin bütün bölgələrindən ümumilikdə 1600-dən çox nümayəndə qatılıb. Tədbirdə qonaq qismində Misirin I xanımı Suzan Mübarək, Türkiyənin Qadın və Ailə Məsələləri üzrə dövlət naziri Nimet Çubukçu, ABŞ-Azərbaycan Cəmiyyətinin sədri Tomris Azəri, Litva Respublikasının Müdafiə Nazirliyinin dövlət katibi Jurate Raquçiene, İordaniyanın Qadın Məsələləri üzrə Milli Komitəsinin baş katibi Əsma Xader, Rusiya Federasiya Şurasının sədr müavini Svetlana Orlova iştirak ediblər. Qurultayı açılış nitqi ilə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova açıb. Komitə sədri qurultayda 1620 nümayəndənin qeydiyyatdan keçdiyini bildirib. Prezident Aparatının humanitar məsələlər üzrə şöbəsinin müdiri Fatma Abdullazadə isə Azərbaycan prezidenti İlham Əliyevin qurultaya ünvanladığı təbrik məktubunu oxuyub.
   Daha sonra Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban Əliyeva qurultay iştirakçılarını təbrik edib. M.Əliyeva Azərbaycanda qadın adının həmişə müqəddəs sayıldığını diqqətə çatdırıb. Bildirib ki, tarixə nəzər salanda Azərbaycan qadınının çox mürəkkəb və şərəfli bir yol keçdiyini görmək olar. Bu gün Azərbaycanın dövlət qurumlarında çalışanların təxminən 40 faizini qadınların təşkil etdiyini qeyd edən M.Əliyeva Milli Məclisdə 14 qadın deputatın olduğunu vurğulayıb. Qarabağ probleminin tezliklə həll olunacağına da ümidvar olduğunu bildirən M.Əliyeva şəhid analarına müraciət edərək, oğullarının ruhlarının əbədi yaşadığını söyləyib. M.Əliyeva respublikamızda qadın hüquqlarının qorunması və bu sahədə mövcud problemlərin aradan qaldırılması istiqamətində atılan addımların yüksək dəyərləndirilməli olduğunu qeyd edib.
   Sonra qurultayda "Azərbaycanda dövlət və qadın siyasəti" filmi nümayiş etdirilib. Qeyd edək ki, qurultayda Azərbaycanda qadın hərəkatının bugünkü vəziyyəti və qarşıda duran vəzifələr mövzusunda fikir mübadiləsi aparılıb, çıxışlar dinlənilib. Bir gün davam edən qurultayın sonunda Azərbaycan prezidentinə və beynəlxalq təşkilatlara müraciət edilib, yekun qətnamə qəbul olunub.
   

Milli Məclisin Beynəlxalq münasibətlər və parlamentlərarası əlaqələr daimi komissiyasının sədri, Avropa Şurası Parlament Assambleyasındakı daimi nümayəndə heyətinin rəhbəri Səməd Seyidov və bir qrup deputat AŞ PA-nın payız sessiyasında iştirak etmək üçün sentyabrın 27-dən oktyabrın 4-dək Strasburqda səfərdə olacaqlar. Bu barədə məlumatı Milli Məclisdən veriblər. Nümayəndə heyətinə deputatlardan Hüquq siyasəti və dövlət quruculuğu məsələləri daimi komissiyasının sədri Əli Hüseynov və Sabir Hacıyev daxildirlər.
   Sessiya dövründə Assambleya Bürosunun və Daimi Komitənin görülən işlər barədə hesabatı dinləniləcək, Rusiya ilə Gürcüstan arasındakı müharibənin nəticələri, Serbiya, Bosniya və Hersoqovina tərəfindən öhdəliklərin yerinə yetirilməsi, Kiprdə mövcud vəziyyət, Avropa Şurasının "Qadınlara qarşı məişət zorakılığı əleyhinə birləşmiş parlamentlər" kampaniyasının icmalı, demokratiyada medianın rolu və digər mövzularda fikir mübadiləsi aparılacaq. Deputatlarımız gündəlikdəki məsələlərlə bağlı çıxış edəcək, fikirlərini bildirəcəklər.
   

Azərbaycanın xarici işlər naziri Elmar Məmmədyarov Nyu-Yorkda iordaniyalı həmkarı Səlahəddin Əl-Bəşir, Avropa İttifaqının Birgə Xarici və Təhlükəsizlik Siyasəti üzrə Ali Təmsilçisi Xavyer Solana, Bolqarıstanın xarici işlər naziri İvaylo Kalfin, Amerikanın Əsas Yəhudi Təşkilatlarının Prezidentlərinin Konfransının rəhbərliyi ilə görüşüb. Bu barədə məlumatı Xarici İşlər Nazirliyi mətbuat xidmətindən veriblər. E.Məmmədyarov görüşlərdə Ermənistan-Azərbaycan, Dağlıq Qarabağ münaqişəsi haqqında danışmış və problemin yalnız Azərbaycanın ərazi bütövlüyü çərçivəsində həllinin mümkün olduğunu bildirib. Həmkarları Azərbaycanın ədalətli mövqeyini dəstəklədiklərini bəyan ediblər. Avropalı rəsmilər Cənubi Qafqazın Avropa İttifaqı üçün əhəmiyyətini qeyd edərək Azərbaycanla münasibətlərin genişləndirilməsində maraqlı olduqlarını bildiriblər. Yəhudi təşkilatının nümayəndələri Azərbaycandakı dözümlülüyü yüksək qiymətləndiriblər. Qeyd edək ki, ikitərəfli görüşlərdə regional, o cümlədən Türkiyənin təklif etdiyi Qafqazda təhlükəsizlik və inkişaf platforması, enerji, beynəlxalq təhlükəsizlik və ikitərəfli məsələlər müzakirə olunub.
   Elmar Məmmədyarov həmçinin Nyu-Yorkda BMT Baş Assambleyasının 63-cü sessiyası çərçivəsində Sloveniyanın prezidenti Danilo Turkla görüşüb. Bu barədə də məlumatı Xarici İşlər Nazirliyi mətbuat xidmətindən veriblər. Görüşdə Sloveniya prezidenti D.Turk Azərbaycan prezidenti İlham Əliyevin Sloveniyaya səfərini yüksək qiymətləndirib və səfərin ikitərəfli münasibətləri yeni səviyyəyə qaldırdığını vurğulayıb. Görüşdə regional, o cümlədən Türkiyənin təklif etdiyi Qafqazda təhlükəsizlik və digər məsələlər müzakirə olunub.
   

Sentyabrın 28-də Belarus Milli Məclisinin Nümayəndələr Palatasına seçkilər keçiriləcək. Milli Məclisin İqtisadi siyasət daimi komissiyasının sədri Ziyad Səmədzadə və deputat Ərəstun Cavadov bu seçkilərdə beynəlxalq müşahidəçi qismində iştirak edəcəklər. Bu barədə məlumatı Milli Məclisdən veriblər. Parlament nümayəndə heyəti burada seçki prosesini izləyəcək, bununla bağlı təəssüratlarını bölüşəcəklər.
   

Rabitə və İnformasiya Texnologiyaları Nazirliyinin Mərkəzi Aparat İşçilərinin Həmkarlar İttifaqı Komitəsinin (RİTNMAİHİK) növbədənkənar iclası keçirilib. Bu barədə məlumatı RİTN-nin mətbuat xidmətindən veriblər. İclasda iştirak edən nazir müavini İltimas Məmmədov iclasın keçirilməsi zərurətinin səbəblərini bildirib və RİTNMAİHİK-nin sabiq sədri Daşdəmir Şərifovun xatirəsi birdəqiqəlik sükutla yad edilib. İclasda müzakirələr nəticəsində yeni tərkibdə Komitənin və təftiş komissiyasının üzvləri seçilib. RİTNMAİHİK-in yeni sədri Şirzad İsmayılov, təftiş komissiyasının sədri isə İlham Mərdanov seçiliblər.
   

Ermənilər srağagün saat 11.20-dən 11.25-dək, 15.15-dən 15.30-dək Qazax rayonunun ərazisindəki adsız yüksəkliklərdə yerləşən mövqelərdən, saat 16.40-dan 17.05-dək və sentyabrın 26-da saat 01.40-dan 02.20-dək, 05.30-dan 05.50-dək Füzuli rayonunun Qərvənd, Horadiz, Aşağı Əbdülrəhmanlı kəndləri yaxınlığında yerləşən mövqelərdən, həmçinin saat 18.30-dan 20.35-dək, 21.15-dən 21.45-dək və sentyabrın 26-da saat 04.10-dan 06.10-dək fasilələrlə Tərtər rayonunun Qızıl Oba, Seysulan, Göyarx, Çaylı və Çiləbürt, saat 20.15-dən 20.20-dək və 23.40-dan 23.45-dək Xocavənd rayonunun Kuropatkino kəndi yaxınlığında yerləşən mövqelərdən Azərbaycan Silahlı Qüvvələrinin üzbəüz mövqelərini avtomat və pulemyotlardan atəşə tutublar. Bütün hallarda düşmən cavab atəşilə susdurulub, itki yoxdur.