Oktyabrın 1-2-də Vaşinqtonda "Azərbaycan-ABŞ strateji tərəfdaşlıq münasibətlərinin inkişafında diasporun rolu" mövzusunda ikigünlük konfrans keçiriləcək. Tədbir Xarici Ölkələrdə Yaşayan Azərbaycanlılarla İş üzrə Dövlət Komitəsi və ABŞ-da fəaliyyət göstərən "US Azeris Network"un (USAN) təşkilatçılığı ilə təşkil olunacaq. Bu barədə məlumatı XÖYAİDK-dən veriblər. Konfransda Amerikadakı Azərbaycan diasporunun artmaqda olan siyasi fəallığı, onun keçdiyi yol və gələcək perspektivləri, Amerika azərbaycanlılarının bu günü, bu ölkədə yaşayan soydaşlarımızın ABŞ cəmiyyətinə inteqrasiyası və ictimai münasibətlərin inkişafında rolu, Konqres, hökümətlərarası və ictimaiyyətlə əlaqələr istiqamətində Azərbaycan diasporu üçün tövsiyələr müzakirə olunacaq. Tədbirin digər hissəsi isə əsasən enerji təhlükəsizliyi məsələlərinə həsr ediləcək. Konfransda Azərbaycanın ABŞ-dakı səfiri Yaşar Əliyev, Azərbaycanın BMT yanında Daimi Nümayəndəliyinin rəhbəri Aqşin Mehdiyev, millət vəkilləri Qənirə Paşayeva, Asim Mollazadə, Sabir Rüstəmxanlı, Azərbaycanın Los-Ancelesdəki Baş konsulu Elin Süleymanov, Dövlət Komitəsinin əməkdaşları və digər rəsmi şəxslər, Amerika Dövlət Departamenti və Dünya Bankının təmsilçisi, Amerika Dövlət Katibinin müavininin köməkçisi, ABŞ-ın Xəzər və Qara dəniz regionlarının enerji siyasəti üzrə nümayəndəsi Metyu Brayza, ABŞ Konqresinin üzvü, Azərbaycan Dostluq Qrupunun həmsədri Solomon Ortiz, USAN-ın icraçı direktoru Adil Bağırov və başqaları iştirak edəcəklər.
   Konfransdan sonra Vaşinqtondakı "Kennedi" mərkəzində Azərbaycan incəsənət ustalarının iştirakı ilə konsert olacaq. Oktyabrın 3-də nümayəndə heyəti Nyu-Yorka gələcək. Burada 18 oktyabr Azərbaycanın Dövlət Müstəqilliyi günü münasibətilə tədbir keçiriləcək.
   

Azərbaycan son dörd ildə iqtisadiyyatın dinamik inkişafına görə dünyanın lider ölkələri sırasında qərarlaşıb. Bunu Heydər Əliyev Fondunun prezidenti, millət vəkili Mehriban Əliyeva dünən keçirilmiş qadınların 3-cü qurultayında çıxış edərkən deyib. M.Əliyeva Azərbaycanda iqtisadiyyatın bütün sahələrinin inkişaf etdirildiyini, ölkəmizdə infrastruktur layihələrinin həyata keçirilməsinin getdigcə geniş vüsət aldığını vurğulayıb. Onun sözlərinə görə, son illərdə "Regionların Sosial İqtisadi İnkişafı" Dövlət Proqramının həyata keçirilməsinin ölkəmizdə yoxsulluğun azaldılması və dinamik inkişafa münbit imkan yarandığını söyləyib. Son dörd il ərzində Azərbaycanda 700 mindən artıq yeni iş yerlərinin açılmasını diqqətə çatdıran Mehriban Əliyeva butün bunların ölkə əhalisinin sosial-iqtisadi rifahının yüksəldilməsinə xidmət etdiyini bildirib.
   Son illər Heydər Əliyev Fondunun dəstəyi ilə Azərbaycanda 1300-dən artıq məktəb inşa olunaraq istifadəyə verilib. Bu barədə də məlumatı Heydər Əliyev Fondunun prezidenti, millət vəkili Mehriban Əliyeva verib. M.Əliyeva həmin təhsil müəssisələrinin ən müasir standartlara cavab verən avadanlıqlarla təchiz olunaraq internet şəbəkəsinə qoşulduğunu bildirib. M.Əliyeva respublikanın bir sıra bölgələrində bəzi ailələrin təhsilə olan marağının aşağı olduğunu da söyləyib. "Bu gün ölkəmizin bir sıra rayonlarında müəyyən qisim ailələrdə xüsusilə qız uşaqları təhsildən yayındırılır. Belə halların mövcudluğu dözülməz faktdır. Çünki cəmiyyətin formalaşmasında qadınların daha da intellektual səviyyəyə malik olmaları zəruridir. Biz çalışmalıyıq ki, ölkəmizdə bu cür mövcud problemləri aradan qaldıraq və qızlarımızın təhsilə cəlb olunması istiqamətində ciddi addımlar ataq"-deyə Mehriban Əliyeva vurğulayıb. M. Əliyeva bu günə qədər respublikada 30-dan artıq uşaq müəsisəsinin də yenidən bərpa olunaraq uşaqların istifadəsinə verildiyini qeyd edib.
   

Nəqliyyat Nazirliyi paytaxt sakinlərinə təhlükəsiz və yüksək keyfiyyətli xidmətin göstərilməsi, o cümlədən tıxacların qarşısının alınması istiqamətində tədbirlər həyata keçirir. Bu barədə məlumatı Nəqliyyat Nazirliyindən veriblər. Bakı şəhərində nəqliyyat vasitələrinin sayının çoxalması yol hərəkətini kəskin şəkildə intensivləşdirib. Nəticədə Bakı şəhəri də bütün iri şəhərlərə xas olan nəqliyyat problemləri ilə üzləşib. Paytaxtda ictimai nəqliyyatın fəaliyyətini tənzimləyən normativ hüquqi bazanın təkmilləşdirilməsi məqsədi ilə "Bakı şəhərində nəqliyyat sisteminin təkmilləşdirilməsi üzrə Tədbirlər Planı"na müvafiq olaraq Nəqliyyat Nazirliyi kompleks tədbirlər həyata keçirir. Tədbirlərin tərkib hissəsi olaraq artıq son günlərdə kiçiktutumlu, texniki parametrlərinə görə standartlara cavab verməyən avtobusların paytaxtın əsasən mərkəzi prospekt və küçələrində hərəkətinə məhdudiyyət qoyulub. Son günlər paytaxt küçələrindən 1000-ə yaxın istismara yararsız avtobuslar yığışdırılıb və mütəmadi olaraq orta və iritutumlu, sərnişinlərə yüksək keyfiyyətli və təhlükəsiz xidmət göstərməyə qadir müasir avtobuslar istismara verilib. Beynəlxalq standartlara cavab verən, paytaxt sakinlərinin razılıqla qarşıladığı yeni avtobuslar Almaniya, Koreya, Belarus və Çin istehsallıdır.
   Xətdən çıxarılan istismara yararsız, bəzən yük daşımaq üçün nəzərdə tutulan avtobusların yerinə bu günlərdə daha bir neçə yeni avtobus istismara veriləcək. Nazirlikdən həmçinin şəhər nəqliyyatında köklü dəyişikliklər edilməsinin də nəzərdə tutulduğu bildirilib.
   

Beynəlxalq Qızıl Xaç Komitəsinin (BQXK) Azərbaycan nümayəndəliyinə yeni rəhbər təyin olunub. Bu barədə məlumatı BQXK-nin mətbuat xidmətindən veriblər. Nümayəndəliyə Belçikadan olan Tun Vandenhuvun rəhbərlik edəcəyi bildirilib. O, oktyabrın 1-dən səlahiyyətlərinin icrasına başlayacaq. BQXK-nin Bakı nümayəndəliyindən bildirilib ki, Tun Vandenhuv artıq Bakıdadır və dünəndən görüşlərə başlayıb. Qeyd edək ki, BQXK-nin Azərbaycandakı nümayəndəliyinə buna qədər Martin Amaşer rəhbərlik edib.
   

Yaxın vaxtlarda Azərbaycanda Mərakeş Krallığının səfirliyi fəaliyyətə başlayacaq. Xarici İşlər Nazirliyi mətbuat xidmətindən verilən məlumata görə, bu barədə Nyu-Yorkda Azərbaycanın xarici işlər naziri Elmar Məmmədyarovla mərakeşli həmkarı Taib Fassi-Fihri arasında keçirilən görüşdə bildirilib. Azərbaycan və Mərakeş XİN rəhbərləri səfirliyin fəaliyyətə başlamasının ikitərəfli əlaqələrin daha da inkişaf etdirilməsinə yardımçı olacağını söyləyiblər.
   

Rabitə və informasiya texnologiyaları nazirinin müavini Elmir Vəlizadənin sədrliyi ilə Standartlaşdırma üzrə "İnformasiya-kommunikasiya texnologiyaları" Texniki Komitənin iclası keçirilib. Bu barədə məlumatı RİTN-dən veriblər. Komitənin tərkibinə ölkənin İKT sahəsində aparıcı dövlət, özəl, elmi-tədris təşkilatları daxildir. Keçirilən iclasda Texniki Komitənin əsasnaməsi üzv təşkilatların nümayəndələri tərəfindən müzakirə olunub, rəy və təkliflər nəzərə alınmaqla səsvermə yolu ilə yekdilliklə qəbul edilib, təsdiq edilməsi üçün aidiyyəti üzrə təqdim olunmasına dair qərar verilib. İclasda həmçinin Texniki Komitənin ilin sonuna qədər olan iş planı təsdiqlənib. Qeyd edək ki, Rabitə və İnformasiya Texnologiyaları Nazirliyi və Standartlaşdırma, Metrologiya və Patent üzrə Dövlət Agentliyinin birgə yaratdığı Standartlaşdırma üzrə "İnformasiya-kommunikasiya texnologiyaları" Texniki Komitənin əsas məqsədi - informasiya-kommunikasiya texnologiyaları sahəsində beynəlxalq və regional standartlara uyğun milli standartların yaradılması, müvafiq tənzimləyici normativ sənədlərin işlənilməsi, onlardan istifadənin effektivliyinin artırılması, beynəlxalq və dövlətlərarası standartlaşdırma işlərində iştirak edilməsidir.
   
   
   
   

Azərbaycana köhnə avtomobillərin gətirilməsinə qadağa qoyulacaq. Bunu jurnalistlərə açıqlamasında ekologiya və təbii sərvətlər naziri Hüseyn Bağırov deyib. Nazir bildirib ki, hazırda nazirlikdə bununla bağlı təkliflər hazırlanır: "Prezidentin göstərişi ilə nazirlik "Avtonəqliyyat vasitələrindən atmosferə atılan tullantıları normallaşdıran standartlar" barədə təkliflər hazırlayır. Bu standartlar "Avro-1", "Avro-2", "Avro-3", "Avro-4" və "Avro-5" standartları adlandırılacaq. Həmin standartlar qüvvəyə minəndən sonra ölkəyə köhnə avtomobillərin gətirilməsinə qadağa qoyulacaq. Belə ki, "Avro-2" və "Avro-4" standartlarına görə, ölkədə bəzi yanacaq vasitələrinin istifadəsi qadağan ediləcək. Bu standartlarda həmçinin köhnə avtomobillərin də hərəkəti qadağan ediləcək". Hüseyn Bağırov bildirib ki, hazırda ölkəyə gətirilən köhnə avtomobillər atmosferə həddindən artıq ziyan vurur. Lakin nazirlik hələlik bu problemi aradan qaldırmaq iqtidarında deyil.
   Bakının havasının çirklənməsinin 80 faizi Balaxanı tullantı poliqonunun üstüaçıq qalması ilə bağlıdır. Hüseyn Bağırovun sözlərinə görə, Ekologiya və Təbii Sərvətlər Nazirliyi həmin ərazidəki zibilliyin basdırılması ilə bağlı tədbirlər planı hazırlayır: "Bu zibillik Bakı sakinləri üçün böyük təhlükədir. Şəhərin havasının çirklənməsinin 80 faiz səbəbkarı həmin zibillikdir. Digər tərəfdən, burada yanğın baş versə, bu daha təhlükəli olar. Burada 10 metrlərlə qalınlıqda zibil qalaqları var ki, bunun da özündən yanma prosesi ola bilər. Əgər belə olarsa, həmin yanğının qarşısını almaq mümkün olmayacaq. Bu Bakı üçün çox böyük problemdir". Nazirin dediyinə görə, hazırda bu məsələ ilə bağlı tədbirlər hazırlanır. Bunun üçün artıq nazirlikdə layihələrin hazırlanmasına və müzakirələrə başlanıb.
   Azərbaycan Xəzəryanı dövlətlər arasında yeganə ölkədir ki, heç bir iqtisadi qazanc əldə etmədən Xəzərin sularını mühafizə etmək üçün xüsusi proqram həyata keçirir. Bunu da jurnalistlərə açıqlamasında ekologiya və təbii sərvətlər naziri Hüseyn Bağırov deyib. Onun sözlərinə görə, digər Xəzəryanı ölkələr də Xəzərin mühafizəsi ilə bağlı tədbirlər görməsinə baxmayaraq yalnız Azərbaycan bu prosesdə qazanc axtarmır: "Ötən il siz şahidi oldunuz ki, bu məqsədlə dənizdə bir sıra stansiyalar quruldu. Bundan başqa, Xəzərin mühafizəsi üçün digər qurğular da quraşdırılıb ki, hazırda həmin qurğular lazımi səviyyədə işləyir. Bu qurğular Xəzərə tökülən suyun təmizlənməsini həyata keçirir. Xəzərin sahilində qurulan stansiyaların fəaliyyəti nəticəsində dənizin sahil zolağındakı natəmizlik də aradan qaldırılıb. Hazırda proqramın icrası davam edir. Artıq tender başa çatıb və Xəzərin təmizlənməsi Novxanı istiqamətində davam etdirilir".
   

Sentyabrın 26-dan respublikanın qərb bölgəsində Əmək və Əhalinin Sosial Müdafiəsi Nazirliyinin sifarişi əsasında müharibə əlilləri və şəhid ailələri üçün inşa edilmiş çoxmərtəbəli binaların açılış mərasiminə start verilib. Nazirlikdən verilən məlumata görə, ilkin olaraq Qazax rayonunda 2 mərtəbəli 16 mənzilli, Tovuz rayonunda 4 mərtəbəli 36 mənzilli, Mingəçevir şəhərində isə 4 mərtəbəli 36 mənzilli binaların açılış mərasimi keçirilərək mənzillər sahiblərinə təhvil verilib. Sentyabrın 27-də isə Qəbələ rayonunda 2 mərtəbəli 16 mənzilli bina müharibə əlilləri və şəhid ailələrinə veriləcək. İsmayıllı rayonunda Əhalinin Sosial Müdafiəsi Mərkəzinin yeni inzibati binasının açılış mərasimi keçiriləcək. Açılış mərasimlərində əmək və əhalinin sosial müdafiəsi naziri Füzuli Ələkbərov, nazirliyin yüksək vəzifəli əməkdaşları və yerli icra hakimiyyəti orqanlarının nümayəndələri iştirak edəcəklər. Qeyd edək ki, 1997-ci ildən başlayaraq ƏƏSMN-nin sifarişi ilə müharibə əlilləri və şəhid ailələri üçün 1425 mənzil istifadəyə verilib. Qərb rayonlarındakı binaların istifadəyə verilməsilə bu göstərici 1529-a çatıb.

Məktəb psixloqlarının işi çox çətindir. Psixoloq Asəf Kərimov hesab edir ki, bu sahənin əməkhaqqı gərgin əməyin müqabilində aşağıdır: "Hazırda məktəbdə işləyən psixoloqların, demək olar ki, hamısı 9 aylıq kurs keçənlərdir. Çünki savadlı psixoloq bu qədər az maaşla işləmək istəmir". Psixoloqların dərs vəsaitlərindən də istifadə edə bilmədiyini deyən A.Kərimov köhnə kitabların günün tələblərinə cavab vermədiyini, psixologiya ilə bağlı yeni baxışların da meydana çıxdığını və bu vəsaiti əldə etməyin çətinliyini də bildirir: "Kitabların da hər biri rus dilində və üstəlik də çox bahadır". Problemlərdən birinin də məktəb psixoloqunun nümunəvi əsasnaməsinin olmaması ilə bağlı olduğunu deyən psixoloq hesab edir ki, xüsusilə şəhər məktəblərində iki psixoloq işləməlidir.
   

Şəhərin mərkəzi küçələrində avtobuslar arasında intervalın artmasına kiçik avtobusların iritutumlu avtobuslarla əvəzlənməsi səbəb olub. Bunu Nəqliyyat Nazirliyindən bildiriblər. Nazirlikdən deyiblər ki, iritutumlu avtobuslar arasında intervalın artması sərnişin sıxlığına səbəb olmayacaq: "İritutumlu avtobus sərnişin daşınması üçün daha yararlı hesab edilir. Sərnişinlərin narazılığı üçün əsas yoxdur. İritutumlu avtobuslar eyni zamanda onlarla sərnişin daşıya biləcək. Buna görə də intervalın azaldılması nəzərdə tutulmayıb". Nazirlikdən qeyd ediblər ki, hazırda gediş haqqlarının plastik kartlarla ödənilməsi mexanizminə keçid əlverişli deyil. Xatırladaq ki, inkişaf etmiş ölkələrdə ödəmə plastik kartlar vasitəsilə aparılır. Buna görə də kondokturlara ehtiyac qalmır, eləcə də vergidən yayınma hallarına yol verilmir. Azərbaycanda isə bu təcrübənin tətbiqi uzun müddət tələb edir.
   

AMEA-da bir müddət əvvəl keçirilən direktor seçkilərində seçkinin baş tutmadığı Fəlsəfə və Siyasi Tədqiqatlar və İqtisadiyyat institutlarına növbəti direktor seçkiləri ilə bağlı sənəd qəbulu elan edilib. Bu barədə AMEA-nın Elmi İnformasiya şöbəsindən məlumat verilib. Namizədlər AMEA-nın bölmələrinin bürosunun üzvləri və ya institutların elmi şuraları tərəfindən irəli sürülür. Qeyd edək ki, sənəd qəbulu oktyabrın 19-da başa çatacaq.
   

Hazırda Beynəlxalq Epizootik Büronun üzvləri ölkədə səfərdədir. Səfər çərçivəsində onların yoxlayıb hesabat hazırlayacaqları məkanlardan biri də ət kəsimi məntəqələridir. Bu sahədə məlumatlı olan mütəxəssislərin sözlərinə görə, hazırda fəaliyyət göstərən ət kəsimi mərkəzləri standartlara cavab vermir. Belə ki, böyük rayon mərkəzlərində ət kəsimi məntəqələrinin tikilməsi və onların lazım olan avadanlıqlarla təmin olunması Dövlət Proqramında nəzərdə tutulsa da, hələ ki, bu sahədə iş aparılmayıb. Hələlik isə ölkədə olan ət kəsimi mərkəzləri ya şəxsi, ya da ki, sovet hakimiyyəti illərindən qalanlardır ki, onların da heç biri müasir standratlara cavab vermir.
   

Artıq şəhərin mərkəzi küçələrində kiçiktutumlu avtobuslar işləməyəcək. Bu barədə "Bakısərnişinnəqliyyat" MMC-dən verilən məlumatda bildirilir ki, şəhərin mərkəzində, sərnişin sıxlığı olan yerlərdə iritutumlu avtobuslar istifadəyə verilir. Belə ki, ölkəyə kifayət qədər iritutumlu "Man" avtobuslarının gətirilməsi uzun müddətdir, sərnişin sıxlığı ilə əlaqədər sərnişinlərin avtobusların dəyişdirilməsi ilə bağlı olan müraciətlərini reallaşdırmağa imkan verəcək.
   
   
   
   
   
   

Bələdiyyə torpaqlarının hərrac və ya müsabiqə yolu ilə satılması qaydalarını tənzimləyən əsasnamənin hazırlanması prosesinin başa çatdığı bildirilsə də, hələlik onun tətbiqi yubadılır. Bütün hallarda isə bundan sonra bələdiyyələr hərrac və ya müsabiqəsiz torpaq satışını həyata keçirə bilməyəcəklər. Hələlik isə torpaq satışının əvvəlki qaydalarla reallaşdırıldığı barədə məlumatlar dolaşmaqdadır. Müsahibimiz millət vəkili, Milli Məclisin regional məsələlər daimi komissiyasının sədri Arif Rəhimzadədir. ("OLAYLAR"İA)
   - Arif müəllim, bələdiyyə torpaqlarının hərrac və ya müsabiqə yolu ilə satılması qaydalarını tənzimləyən əsasnamənin taleyi nə yerdədir? Artıq bu məsələ ilə bağlı cəmiyyətdə müəyyən narahatçılıq ifadə olunur.
   - Bu məsələ Milli Məclisin regional məsələlər daimi komissiyasında da müzakirə olunub. Məsələ ilə bağlı komissiya üzvləri də narahatçılıqlarını dilə gətirdilər. İclasa dəvət olunmuş Ədliyyə Nazirliyi, Dövlət Torpaq və Xəritəçəkmə Komitəsinin də nümayəndələri məsələ ilə bağlı öz fikirlərini ifadə etdilər. Komissiya sədri kimi mən də öz fikrimi açıqladım. Bir daha bildirirəm ki, sözügedən əsasnamənin hazırlanması Nazirlər Kabinetinə tapşırılıb. Məlumata görə, artıq sənəd üzərində iş başa çatıb. Dövlət Torpaq və Xəritəçəkmə Komitəsi bununla bağlı öz layihəsini verib və həmin layihədə müəyyən çatışmazlıq olduğundan yenidən düzəldilib. Düzdür, bu məsələ ləngiyir, ancaq lazımi istiqamətdə fəaliyyət davam etdirilir. Hələlik mən bu sənədlə tanış olmamışam. Çünki bu məsələ birbaşa bizim səlahiyyətimizə aid deyil. Daha doğrusu, həmin sənədlə bağlı hansısa bir qanunda ziddiyyət yaransa və yaxud hansısa qanuna düzəliş və yaxud əlavə edilməsi lazım gələrsə, çox güman ki, bizə müraciət ediləcək. Demək istəyirəm ki, bu məsələ müvafiq icra hakimiyyəti orqanı kimi Nazirlər Kabinetinə tapşırılıb.
   - Məlumata görə, bəzi bələdiyyələr əsasnamənin təsdiqini gözləmədən əvvəlki qayda ilə torpaq satışını davam etdirirlər...
   - Bələdiyyələrin fəaliyyəti ilə əlaqədar qanunverici orqan kimi bizə çoxlu müraciətlər daxil olur. Biz də müvafiq qaydada müraciətləri araşdırmaq üçün Ədliyyə Nazirliyinin Bələdiyyələrlə İş üzrə Mərkəzinə göndəririk. Onlar da həmin müraciətləri yoxlayaraq müvafiq cavablarını verirlər. Eyni zamanda əgər həmin müraciətdəki nöqsanlar, səhvlər təsdiq olunsa, o zaman müvafiq tədbirlər də görülür. Ancaq düzünü desəm, dediyiniz məsələ ilə bağlı hansısa bir fakt mənə məlum deyil. Ola bilsin ki, haradasa belə hadisə baş verib və yaxud ola bilər ki, bunlar sadəcə söz-söhbətlərdir. Bütün hallarda çox təəssüflənlirici haldır ki, bələdiyyələr insanların şüurunda "torpaq satan" bir orqan kimi iz salıb. Ancaq bir daha qeyd edirəm ki, şəxsən mən dediyiniz faktla rastlaşmamışam.
   - Qanunverici orqanın təmsilçisi kimi ümumilikdə bələdiyyələrin fəaliyyətini necə qiymətləndirirsiniz?
   - Hər halda Azərbaycanda bələdiyyələr öz fəaliyyətlərini gündən-günə genişləndirlər. Desəm ki, bələdiyyələrin fəaliyyətindən bütövlükdə razıyam, bu, düzgün olmazdı. İş burasındadır ki, elə məsələlər var ki, onlar bələdiyyələrdən də asılı deyil. Məsələn, biri deyir kiminsə pəncərəsinin qarşısında hasar tikilib, yaxud yüksək mərtəbəli evin yuxarı mərtəbəsindən kimsə qarpız, yemiş, kartof, soğan qabığı və digər məişət tullantılarını aşağı tullayır. Belə halda həmin ərazidə fəaliyyət göstərən bələdiyyə və bələdiyyə üzvləri necə fəal olsalar da, necə yaxşı işləsələr də, bu halların qarşısını ala bilməzlər. Sözümün canı odur ki, bu gün bələdiyyələrin fəaliyyətində daha çox özünü göstərən elə hallar var ki, əslində onlar insanların daxili mədəniyyətinin olmaması nəticəsində üzə çıxır. Belə məsələlər çox zaman bələdiyyələrin fəaliyyəti ilə əlaqələndirilir, amma həmin bələdiyyə üzvləri də bizim sıralarımızdan çıxan insanlardır. Onlar bizdən ağıllı insanlar deyillər ki? Biz nə ediriksə, onlar da onu edir. Odur ki, bələdiyyələrin fəaliyyətini birdən-birə yüksək səviyyəyə qaldırmaq, ideal da olmasa onlara yaxşı demək üçün hələ bir müddət vaxt lazımdır. Bizim gərək ümumi mədəniyyətimiz artsın ki, bələdiyyələrə bütövlükdə münasibətimiz dəyişsin. İnsanlar bələdiyyələrin rolunu tam mənada başa düşsün, fəaliyyətlərini qurmaq üçün bələdiyyələrə tələb olunan vergilərini ödəsinlər. Bunlar hamısı olmadan bələdiyyələri tənqid etməklə heç nə əldə etmək mümkün deyil.
   

Oktyabrın əvvəllərində Bakıda dünyanın bir sıra ölkələrini təmsil edən 200 nümayəndənin iştirakı ilə "Təhsil və karyera" mövzusunda ikinci Beynəlxalq sərgi-konfrans keçiriləcəkdir. Azərbaycanın təhsil sahəsində qazandığı uğurları nümayiş etdirməli olan konfransda iştirakçılar öz təhsil müəssisələrinin təcrübəsini bölüşəcək, müştərək layihələrin həyata keçirilməsi, müasir tələblərə cavab verən kadrların hazırlanması yollarını müzakirə edəcəklər. Sərginin əsas bölmələri orta və ali təhsil sisteminin təşkili, xaricdə təhsil, dillərin öyrənilməsi, ixtisasartırma kurslarının fəaliyyəti məsələlərinə həsr olunacaqdır. Gənclərin işlə təmin olunması problemlərinə, təhsil sahəsində tətbiq edilən informasiya texnologiyalarına, məktəbli formasının və dəftərxana ləvazimatlarının istehsalı ilə bağlı məsələlərə aid materiallar da nümayiş olunacaqdır. Sərgi çərçivəsində Azərbaycanda ilk beynəlxalq kitab yarmarkası da keçiriləcəkdir. Yarmarkanın bölmələrində elmi və bədii ədəbiyyat, orta və ali məktəblər üçün dərsliklər və başqa nəşrlər, özəl mətbəələrin məhsulları nümayiş etdiriləcəkdir.
   

Beynəlxalq ekspertlər Azərbaycan polisinin sərbəst toplaşmaq azadlığı zamanı ictimai asayişin təmin edilməsi təcrübəsini yüksək qiymətləndiriblər. Azərbaycan polisinə belə bir qiymət ölkədə "Sərbəst toplaşmaq azadlığı zamanı polisin hüquq və vəzifələri" mövzusunda keçirilən treninqlərdən sonra verilib. Qeyd edək ki, belə treninqlər paytaxtla yanaşı, respublikanın regionlarında həyata keçirilib. Beynəlxalq ekspertlər etiraf ediblər ki, Azərbaycan polisi həm qanunvericiliyi lazımi səviyyədə bilir, həm də praktikada müəyyən vərdişləri var. Üstəlik, yeni bacarıqların əldə edilməsi istiqamətində cəhd göstərirlər. Ümumi rəy ondan ibarət olub ki, Azərbaycan polisi standartlarına görə heç də Avropa ölkələrindən geridə qalmır.
   

Yeni Azərbaycan Partiyası Gənclər Birliyi prezident seçkilərində gənclərin seçki fəallığının artırılması məqsədilə nəzərdə tutduğu proqram əsasında tədbirlərini davam etdirir. Bu barədə açıqlama verən YAP Gənclər Birliyinin sədri Ramil Həsənov deyib ki, bu məqsədlə oktyabrın 2-də Lənkəranda ilk dəfə səs verən gənclərlə görüş keçiriləcək: "Bundan sonra analoji görüşlər oktyabrın 4-də Quba, oktyabrın 6-da isə Şəkidə təşkil olunacaq". Ramil Həsənov prezidentliyə namizəd İlham Əliyevin vəkili kimi oktyabrın 6-10-u tarixlərində Yevlax, Mingəçevir və Bərdədə seçicilərlə görüş keçirəcəyini də deyib.
   

Ölkəmizdə səfərdə olan Türkiyənin ədliyə naziri Mehmet Ali Şahin azərbaycanlı həmkarı Fikrət Məmmədovla görüşüb. Azərbaycanın ədliyyə naziri görüş zamanı qonağa prezident İlham Əliyevin rəhbərliyi altında aparılan məhkəmə-hüquq islahatları barədə məlumat verib, hüquq sahəsində əməkdaşlıq üzrə faydalı fikir mübadiləsi aparılıb. Eyni zamanda beynəlxalq təşkilatlar çərçivəsində ikitərəfli və çoxtərəfli səviyyədə qarşılıqlı fəaliyyətin səmərəliliyi, hüquqi əməkdaşlıq sahəsində mövcud müqavilə bazasının təkmilləşdirilməsi barədə fikir mübadiləsi aparılıb. Konkret sahələr üzrə qarşılıqlı fəaliyyətin həyata keçirilməsi üzrə razılığa gəlinib. Azərbaycanda həyata keçirilən hüquqi islahatlara böyük maraq göstərən türkiyəli nazir hüquqi sahədə əməkdaşlığın prespektivlərə malik olduğunu vurğulayıb. Türkiyə nümayəndə heyəti nazirlikdə "Heydər Əliyev" və "Azərbaycan ədliyyəsinin tarixi" muzeyi, Azərbaycan-Türkiyə münasibətlərinə həsr olunmuş ekspozisiyalarla tanış olublar. Qonaqlara Ermənistan-Azərbaycan münaqişəsilə bağlı materialları əks etdirən xüsusi dərgi təqdim edilib.
   

Milli Elmlər Akademiyasının Fizika İnstitutunda ABŞ-ın Bakıdakı səfirliyinin regional ekologiya, elm, texnologiya və səhiyyə üzrə baş katibi Kamilla D.Nillə görüş keçirilib. Qeyd olunub ki, tədbirdə alternativ enerji mənbələrilə bağlı məsələlər müzakirə obyekti olub. "Azərbaycan Respublikasında alternativ və bərpa olunan enerji mənbələrindən istifadə edilməsi üzrə Dövlət Proqramı"na müvafiq həyata keçirilən işlərlə bağlı məlumat verilib. ABŞ-ın alternativ enerji sahəsində Azərbaycana yardım edə biləcəyi bildirilib.