Türkiyənin xarici işlər naziri Əli Babacan "İnternational Herald Tribune" qəzeti üçün yazdığı məqalədə Ankaranın irəli sürdüyü Qafqazlarda Sabitlik və Əməkdaşlıq Platformasının bu regionda problemlərin həlli ilə məşğul olan digər təsisat, mexanizm və təşkilatlara alternativ olmadığını qeyd etmişdir. Əli Babacan vurğulamışdır ki, platforma Qafqaz regionu ölkələri arasında kommunikasiyaların daha da təkmilləşdirilməsi, sabitlik və əməkdaşlıq üçün qarşılıqlı etimadın artırılması, siyasi dialoqun gücləndirilməsinə xidmət edəcək əlavə təşəbbüs kimi qəbul olunmalıdır.
   Məqalədə deyilir ki, Rusiya ilə Gürcüstan arasında münaqişə Cənubi Qafqazda sülhün nə qədər kövrək olduğunu və buradakı gərginliyin bütün dünyaya necə təsir etdiyini bir daha göstərdi. Bu hadisələr regionun digər ölkələrinə də təsirini göstərdi. Məsələn, Ermənistan özlərinin başlıca nəqliyyat dəhlizindən məhrum olmaq təhlükəsi ilə üzləşdi. Avropa və dünya üçün əhəmiyyətli olan Bakı-Tbilisi-Ceyhan neft, Bakı-Tbilisi-Ərzurum qaz və Bakı-Tbilisi-Qars dəmir yolu layihələri ilə bağlı ciddi əndişələr yarandı. Region ölkələrinin qonşusu kimi Türkiyə bu gərginliyin azaldılması istiqamətində səylərini gücləndirdi.
   Əli Babacanın fikrincə, Cənubi Qafqaz ölkələri burada olan problemlərin həllinə ilk növbədə özləri səmərəli yollar tapmalıdırlar. Bunun üçün münbit şərait lazımdır. Türkiyənin təşəbbüsü də məhz bu etimad mühitinin yaranmasına xidmət edir. Ankaranın Yerevanla ikitərəfli əlaqələrinin normallaşdırılması da bu kontekstdə zəruri addım kimi dəyərləndirilməlidir. Türkiyə bu münaqişələrin dialoq və sülh yolu ilə həllində beynəlxalq hüququn başlıca prinsipləri olan dövlətlərin müstəqillik, suverenlik və ərazi bütövlüyünü hər zaman dəstəkləmişdir.
   

Almaniya hökuməti narkotiklərin qanunsuz dövriyyəsi ilə mübarizədə Əfqanıstanın hakimiyyət orqanlarına yardım proqramını təklif etmişdir. Almaniya Müdafiə Nazirliyinin başçısı Frants Yozef Yunq "Deutschlandfunk" radiostansiyasına müsahibəsində bildirmişdir ki, Əfqanıstandakı alman hərbçiləri narkomafiyaya qarşı mübarizədə bu ölkəyə kömək etməlidirlər. Yunq demişdir: "Məndə belə bir təəssürat yaranır ki, Əfqanıstanda alman əsgərlərə qarşı hücumların müəyyən gizli səbəbləri var". O bildirmişdir ki, ölkənin narkomafiyası terrorçuları maliyyələşdirir. Gözlənildiyinə görə, Bundestaq oktyabrın 16-17-də Əfqanıstanda alman hərbi qulluqçularının missiyası müddətinin uzadılması məsələsini və kontingentin 3500 nəfərdən 4500 nəfərədək artırılmasını müzakirə edəcəkdir. Əfqanıstanda alman hərbçilərin funksiyaları Almaniya parlamenti tərəfindən müəyyən edilmişdir və ölkənin müdafiə nazirinin kontingentin üzərinə əlavə vəzifələr, xüsusən narkotiklərin istehsalı və ixracı ilə mübarizə aparmaq vəzifəsi qoymaq səlahiyyəti yoxdur.
   

Sentyabrın 21-də senatorların müəyyən hissəsinin təzələnməsi ilə əlaqədar keçirilmiş seçkilərdən sonra qanunverici orqanın yuxarı palatasının Senata sədrlik uğrunda mübarizəsi qızışmışdır. Senatın hazırkı sədri, Xalq Hərəkatı Uğrunda (UMP) Partiyadan olan 80 yaşlı Kristian Ponsöle yenidən öz namizədliyini irəli sürməyi qərara almışdır. Daha üç nəfər Senat sədri vəzifəsinə seçilməkdə iddialıdır. K.Ponsölenin partiyadaşı, keçmiş baş nazir Jan-Pyer Raffarən, keçmiş maliyyə naziri Jerar Larşe və baş maliyyə müfəttişi Filip Marini də oktyabr ayının 1-də keçiriləcək Senat sədrliyinə namizəd göstərilmişlər. Yerli siyasətçilər iqtidara daha yaxın olan Jan-Pyer Raffarənin Senatın sədri seçilməyə daha real namizəd olduğunu bildirmişlər. Xatırladaq ki, Kristian Ponsöle 1998-ci ildən Senata sədrlik edir.
   

İtaliyanın Neapol şəhəri yaxınlığında iki mafiya dəstəsinin qarşıdurması zamanı 6 nəfərin həlak olması hökuməti yerli mafiyaya qarşı genişmiqyaslı əməliyyata başlamağa vadar etmişdir. Ölkənin daxili işlər naziri parlamentdəki çıxışında hökumətin mafiya ilə mübarizə aparmasının və bu məsələyə ciddi nəzarət etməsinin zəruriliyini bəyan etmişdir. Nazir mafiya ilə mübarizə üçün 500 hərbçinin səfərbər edildiyini və onların cənub regionundakı 400 polis və karabinerlərə hərtərəfli kömək göstərəcəyini bildirmişdir. Xatırladaq ki, İtaliyada 1990-cı ildən etibarən ordu ölkənin cənubunda mütəşəkkil cinayətkarlığa qarşı mübarizə aparmağa cəlb olunur.
   

Avropa İttifaqına üzv ölkələrin ədliyyə və daxili işlər nazirləri gizli immiqrasiyanın qarşısını almaq üçün sərt tədbirlər görülməsi barədə ümumi razılığa gəlmişlər. Ölkə rəhbərlərinin oktyabrda görüşündə bu razılaşmanın müzakirə edilməsi və yeni qaydaların qəbulu nəzərdə tutulmuşdur. Yeni qaydaya görə, Avropa ölkələri kütləvi immiqrasiyaya ciddi nəzarət edəcək, yüksək ixtisaslı kadrlara isə xüsusi göy kart veriləcəkdir. Onlar bu kartla Avropanın istənilən ölkəsinə getmək imkanı əldə edəcəklər.
   Bu qərar son vaxtlar Avropa ölkələrinə axının və gizli yollarla qitəyə gəlməyə cəhd göstərərkən yollarda çoxlu insan tələfatının qarşısını almaq məqsədi daşıyır. İlin sonunadək Avropa İttifaqına sədrlik edəcək Fransa immiqrasiya ilə bağlı yeni sistemin qəbul olunmasında maraqlı olduğunu bəyan etmişdir.
   

Hökumətin 2010-cu ildə poçt sahələrini özəlləşdirmək qərarına etiraz əlaməti olaraq ölkənin 300 mindən artıq poçt işçisini öz ətrafında birləşdirən beş həmkarlar təşkilatının çağırışı ilə poçt işçilərinin 40 faizi tətil etmişdir. Tətil zamanı 240-dan artıq poçt idarəsi fəaliyyətini dayandırmışdır. Parisdə 3, Nantda 2, Tuluzada 2 min, Marsel, Bordo, Orlean və Lion şəhərlərinin hər birində mindən artıq poçt işçisi tətildə iştirak etmişdir. Ölkənin digər bölgələrində də tətilçiləri müdafiə edən nümayişlər keçirilmişdir. Şəhərdaxili nəqliyyat işçiləri də tətilçilərlə həmrəy olduqlarını bildirmişlər. Metrolarda hər beş qatardan biri hərəkətini dayandırmışdır. Tətilçilər hökumətin qərarını dəyişmədiyi təqdirdə daha izdihamlı tətil və mitinqlər keçirəcəklərini bəyan etmişlər.
   

Sentyabrın 23-də Nyu-Yorkda, BMT Baş Məclisinin 63-cü sessiyasının ümumi müzakirələrində Türkiyə Prezidenti Abdullah Gül bəyanatla çıxış etmişdir. Ölkəsinin beynəlxalq sülh və sabitliyin bərqərar olmasında rolu barədə ətraflı danışan Türkiyənin dövlət başçısı bildirmişdir ki, Türkiyənin təşəbbüsü olan "Qafqazda Sabitlik və Əməkdaşlıq Platforması" Cənubi Qafqazda gələcək münaqişələrin qarşısını alacaq, bölgədə etimad ab-havası yaradacaq və ümumi problemləri demokratik çərçivədə müzakirə etməyə imkan verəcək vasitəyə çevrilə bilər. O demişdir ki, Ermənistana və Azərbaycana səfərlərinin təəssüratları, eləcə də Baş nazir Ərdoğanın Rusiya və Gürcüstana səfərlərinin nəticələri belə deməyə əsas verir ki, bütün maraqlı tərəflər təşəbbüsü dəstəkləyir. Prezident ümid etdiyini bildirmişdir ki, təşəbbüs nəticəsində yaradıla biləcək müsbət perspektivlər "işğal edilmiş Dağlıq Qarabağ da daxil olmaqla, bölgədəki dondurulmuş münaqişələrin ərazi bütövlüyü prinsipi əsasında həllinə töhfə verəcəkdir". Türkiyə Prezidentinin sözlərinə görə, bu perspektiv bölgədəki dövlətlər arasında ikitərəfli əlaqələrin yaxşılaşdırılmasına da kömək edərdi.