Azərbaycanın xarici işlər naziri Elmar Məmmədyarov BMT Baş Məclisinin 63-cü sessiyasının ümumi müzakirələrində iştirak etmək məqsədi ilə Nyu-York şəhərində işgüzar səfərdədir. Xarici İşlər Nazirliyinin mətbuat xidmətindən bildirmişlər ki, E.Məmmədyarov səfər çərçivəsində GUAM xarici işlər nazirlərinin iclasında iştirak etmişdir. Nazirlər GUAM çərçivəsində siyasi və iqtisadi əməkdaşlıq, eyni zamanda praktiki layihələrin yerinə yetirilməsini müzakirə etmişlər. Görüşdə GUAM-ın fərdi dövlətlər və digər beynəlxalq təşkilatlarla əməkdaşlığının hazırkı vəziyyəti və gələcək əməkdaşlıq potensialı ətrafında fikir mübadiləsi aparılmış, GUAM Katibliyinin fəaliyyəti və onun daha da təkmilləşdirilməsi müzakirə edilmişdir.
   ABŞ dövlət katibinin müavini Daniel Fridin təmsilçiliyi ilə GUAM+ABŞ formatında da görüş keçirilmişdir. Tərəflər GUAM+ABŞ praktiki əməkdaşlığını və layihələri müzakirə etmişlər. E.Məmmədyarov həmçinin Rumıniyanın xarici işlər naziri Lazar Komenesku ilə də görüşmüşdür. Görüşdə regional vəziyyət, Türkiyənin təklif etdiyi Qafqazda Təhlükəsizlik və İnkişaf Platforması, enerji və ikitərəfli məsələlər müzakirə edilmişdir. Elmar Məmmədyarov Ermənistan-Azərbaycan, Dağlıq Qarabağ münaqişəsi barədə danışmışdır. Rumıniya rəsmisi regional münaqişələrin ərazi bütövlüyü prinsipi əsasında həll olunmasının zəruriliyini vurğulamışdır. Görüşdə Rumıniyanın GUAM-la əməkdaşlığı da müzakirə movzusu olmuşdur.
   

Londonda fəaliyyət göstərən Transatlantik Elmi Araşdırmalar İnstitunun Bakıda səfərdə olan rəhbəri Ziba Norman bildirib ki, hazırda Dağlıq Qarabağ münaqişəsinin beynəlxalq hüquq normaları çərçivəsində həll edilməsini və Ermənistanla Azərbaycan arasında vasitəçilik missiyasını üzərinə götürən ATƏT-in Minsk qrupu münaqişənin həllilə kifayət qədər maraqlanmırlar. ABŞ İraq, Rusiya Abxaziya və Osetiya, Fransa isə digər məsələlərə daha çox üstünlük verir. O, indiki halda Türkiyənin münaqişənin həlli istiqamətində atacağı addımların daha əhəmiyyətli olmasına diqqət çəkib. Xarici qonağın fikrincə, hazırda Ermənistan rəhbərliyinə daxili təzyiqlər artmaqdadır və vətəndaşlar Osetiyadakı vəziyyətlə qarşılaşmaq istəmirlər: "Türkiyənin münaqişənin həlli prosesinə qoşulması daha effektiv ola bilər. Artıq vaxt gedir və münaqişənin silahla öz həllini tapması məsələsi gündəmə gəlir".
   "Cənubi Osetiyada baş verən hadisələr Qarabağ münaqişəsinin həlli üçün təkan rolunu oynayacaq. İndi artıq Rusiyanın bütün sahələrdəki gücü tükənməkdədir. Bu dövlət indi yalnız öz ordusuna güvənir". Bu fikirləri də jurnalistlərə verdiyi açıqlamada Londonda fəaliyyət göstərən Transatlantik Elmi Araşdırmalar İnstitutunun rəhbəri Ziba Norman deyib. Xanım Normanın fikrincə, hazırda beynəlxalq ictimaiyyətin bu dövlətə olan inamı azalmağa doğru gedir və baş verənlərdən sonra Vladimir Putin qurduğu siyasətin qiymətini aldı. Z.Normanın sözlərinə görə, hələlik regionda vəziyyətin stabilləşməsi mümkün deyil və Rusiyanın özünün də təəccüblənə biləcəyi hadisələr baş verə bilər.
   Son hadisələrdən sonra beynəlxalq ictimaiyyətlə Qafqaz regionunun münasibətləri yeni mərhələyə qədəm qoyacaq. Rusiya-İran münasibətlərinə toxunan qonaq əslində zahirən bu iki ölkə arasında görünən dostluğun pərdə arxasında kifayət qədər soyuq məqamların durduğunu deyib və fikrini Osetiya məsələsində İranın şimal qonşumuzun mövqeyini tənqid etməsilə əsaslandırıb. Norman bu vəziyyətin daha çox Türkiyənin xeyrinə olduğunu bildirərək, bu ölkənin Rusiya ilə İran arasında da vasitəçilik edə biləcəyini istisna etməyib: "Ancaq Türkiyə bu məsələdə çox ehtiyatlı davranmalıdır. Çünki Türkiyə ilə Rusiya arasında ticarət dövriyyəsi yüksəkdir. Hansısa yanlışlığa yol veriləcəyi təqdirdə bu dövlət Rusiya ilə münasibətlərini soyuda bilər".
   

"Bu gün Azərbaycanda yeni müxalifət formalaşmalıdır. Yeni müxalifət qüvvələri konstruktiv mövqedə dayanmalıdır". Millət vəkili Eldar İbrahimov bildirib ki, müxalifət dövrün tələbləri ilə ayaqlaşmalı və yeni dünyagörüşünə malik olmalıdır: "Onlar sadəcə olaraq beynəlxalq təşkilatlardan qrant almaq xatirinə müxalifət adından əl çəkmirlər. Hələ seçki prosesi başlanmamış ABŞ səfirliyi bu məqsədlə 3 milyon dollar ayırıb. Təbii ki, bu pulu indi müxalifət adına iddia edənlər xərcləyəcək. Bu baxımdan hakimiyyət də istəyir ki, yeni, cavan, intellektual səviyyəsi yüksək olan müxalifət formalaşsın. Biz bilirik ki, müxalifətin güclü olması iqtidarın xeyrinədir. Müxalifət nə qədər güclü olsa, iqtidar o qədər yaxşı işləyər. Əslində müxalifət görünməyən problemləri üzə çıxarmalıdır. Amma bizimkilər şər, böhtana üstünlük verirlər".
   

Gənclər Təşkilatları Milli Şurası Azərbaycanda keçiriləcək prezident seçkilərini izləmək məqsədilə müşahidəçi missiyası göndərmək üçün Avropa Gənclər Forumuna müraciət edib. Millət vəkili, Gənclər Təşkilatları Milli Şurasının sədri Fuad Muradov bildirib ki, belə bir müraciət etməkdə məqsəd beynəlxalq təşkilatların və Avropa gənclərinin Azərbaycanda keçiriləcək prezident seçkilərinin demokratik şəraitdə baş tutmasını müşahidə etməkdir: "Gənclər Təşkilatları Milli Şurası artıq neçə illərdir ki, Avropa Gənclər Forumu kimi nüfuzlu beynəlxalq qurumlarla əməkdaşlıq edir. Hətta bir sıra beynəlxalq təşkilatların bərabərhüquqlu üzvüdür. Həmin təşkilatlarla bizim çox yaxın əməkdaşlığımız var. Bu baxımdan istərdik ki, beynəlxalq təşkilatların nümayəndələri Azərbaycanda keçiriləcək 15 oktyabr prezident seçkilərini yaxından izləsinlər. Çox güman ki, onlar bizim müraciətimizi nəzərə alıb öz nümayəndələrini seçkiləri müşahidə etmək üçün Azərbaycana göndərəcəklər".
   

DAK rəhbərliyi, həmsədrlər və İdarə Heyətinin bir neçə üzvü ABŞ-a səfər edəcək. Səfər çərçivəsində bir sıra rəsmilərlə görüşlər də nəzərdə tutulub. Bu barədə məlumat verən DAK NTK-nın üzvü Samir Əsədli gələn həftə baş tutacaq səfərdə Azərbaycanın taleyüklü məsələləri-Xocalı soyqırımı, Qarabağ münaqişəsi, Ermənistanın ölkəmizə təcavüzü, İran rejiminin Azərbaycan türklərinə qarşı apardığı siyasət bir sıra yüksək dairələrdə müzakirə olunacaq. S.Əsədlinin dediyinə görə, müzakirə olunacaq məsələlər arasında Güneydəki soydaşlarımızın durumuna daha çox diqqət ayrılacaq. Məlumat üçün bildirək ki, hazırda səfərlə bağlı bir sıra hazırlıq işləri görülür.
   

Hazırda Azərbaycanda sərbəst toplaşmaq azadlığının həyata keçirilməsi sahəsində hər hansı maneə yoxdur. Bu, insan hüquq və azadlıqları ilə əlaqədar Avropa standartlarının Azərbaycan qanunvericiliyində impilimitasiyası ilə bağlı yaradılan beynəlxalq işçi qrup tərəfindən həyata keçirilən monitorinq nəticəsində müəyyən edilib. İşçi qrupundan verilən məlumata görə, hazırda qrup prezident seçkiləri dövründə sərbəst toplaşmaq azadlığının monitorinqini davam etdirir. Monitorinq sentyabrın 17-dən - namizədlərin təbliğat kampaniyasına rəsmi start verildiyi gündən başlanıb. İşçi qrupuna Azərbaycandan dövlət və qeyri-hökumət təşkilatları və beynəlxalq təşkilatların ekspertləri daxildir.